Testar Kvilekroken

Lars Eide er oppvaksen i Øystese, men bur no på Stord saman med kona Hallbjørg Sagmo Eide. Ekteparet eig ein feriebustad i Kvam og plar bu der i delar av sommarferien. Lars fortel at familien likar å gå i fjellet, men at dei går mest i området rundt Øystese.

– Eg gjekk til Krokavatnet éin gong for førti år sidan, seier han.

– Moderne og idyllisk

Ekteparet hadde lese om Kvilekroken dagsturhytte i HF, og bestemte seg for å ta seg ein tur saman med den yngste sonen, Lars Erik. Dei har ikkje besøkt andre dagsturhytter før, men tykkjer det er eit greitt konsept.

– Det er kjekt å ha ein slik stad å gå til, fortel Hallbjørg.

Ho trur det må vera ideelt for barnefamiliane, fordi ein kan leika og låna bøker inne i hytta. Paret observerte at helikopter flaug opp materialane då hytta skulle setjast saman. Dei tykkjer resultatet ser bra ut.

– Den moderne stilen står i fin kontrast til dei meir tradisjonelle hyttene i området, seier Lars.

Ifølgje han passar hytta inn i naturen. Han synest staden er idyllisk, men kunne tenkt seg utsikt mot fjorden. Hallbjørg er glad i utsikta mot vatnet og likar utsjånaden til hytta.

– Eg er kanskje litt partisk, men naturen i Kvam er jo heilt strålande! seier Lars.

Han synest det er positivt at heradet legg til rette for dagsturhytter i nærområdet. Ifølgje han er det eit godt tilbod som er med på å trekkja folk til fjells. Hallbjørg tykkjer turen er overkomeleg for dei fleste.

– Det var fint å sjå på utsikta medan me gjekk oppover. Og så var me skikkeleg heldige med vêret i dag! seier ho.

Ifølgje Hallbjørg kjem familien truleg tilbake til Kvilekroken fleire gongar.

Lurt med le

Leiar i Kvam Turlag, Kjell Inge Tufte Tyssen, har inntrykk av at mange er innom Kvilekroken. Han fortel at staden har eit eige sjekkpunkt i appen Postkassetrimmen. Då HF sjekka denne veka, var det registrert 1.733 vitjingar der. I tillegg kan ein skriva seg inn i hytteboka.

– Krokavatnet var eit populært turmål frå før, men eg trur turtrafikken auka litt etter at hytta kom opp, fortel Tyssen.

Han tykkjer dagsturhytter er eit godt konsept som gjer at ein kan sitja varmt og tørt i turpausen. Tyssen synest også det er kjekt å ha vatn der ein kan leika og bada i nærleiken. Ifølgje han finst det ein kano og to kajakkar til utlån i samband med hytta.

– Utforminga til hytta gjer at ein nesten alltid kan sitja i le for vinden, seier Tyssen.

Han forklarar at der er sitjeområde i alle himmelretningane. Ei frivilliggruppe frå Kvam Turlag har ansvar for lett vedlikehald på staden. Det inneber å moppa golvet, sørgja for nok dopapir og å sjå til at hytta er rein og ryddig. Etter avtale med Kvam herad skal ein frivillig person innom kvar 14. dag og sjekka tilstanden.

– Vedlikehaldet har gått veldig bra så langt eg veit, seier Tyssen.

Han legg til at toalettløysinga ikkje er ideell. Utedoen har berre éin tank som står der til han vert full. Då har heradet ansvar for å tømma han. Dette har skjedd éin gong sidan hytta opna i juli 2021. Tyssen meiner det burde vore fleire tankar å byta mellom. Utanom toalettet er han svært nøgd med dagsturhytta.

– Ho har eit lite bibliotek og flott utsikt til naturen, fortel han.