Testar heimelaga vindmølle

Han har bygd ein prototype som han for tida testar. Mølla står i hagen i Vangdal. Den har lite til felles med tradisjonelle vindmøller, som har tre lange propellblad på toppen av eit tårn. I staden er mølla kort og kompakt og har åtte vertikale blad.

Auganæs hevdar konseptet har fleire føremoner. For det første er mølla heilt lydlaus. For det andre vil ikkje blada treffa flygande fuglar.

– Dekkjer behovet

Då HF vitja Auganæs fredag 13. oktober, hadde den om lag eit halvt tonn tunge testmølla stått i hagen i fire dagar. Førebels har ikkje mølla generator. Auganæs har likevel freista rekna ut kor mykje straum den vil produsera. Hans konklusjon er at mølla truleg kan produsera meir enn nok straum til å dekkja årsforbruket til ein bustad.

– Dersom mølla står på ein stad med mykje vind, trur eg den kan produsera mellom 50.000 og 60.000 kilowattimar i året, seier Auganæs.

Ifølgje nettsida til straumleverandøren Fjordkraft AS brukar norske bustader i snitt 20.000 kilowattimar i året.

– Det betyr ikkje at dei som har ei mølle, kan klara seg utan eit straumabonnement. Dei treng straum utanfrå når det ikkje blæs. Men når det blæs mykje, produserer dei eit straumoverskot dei kan selja via ein plusskundeavtale, seier Auganæs.

Ein vinter med testing

Auganæs har jobba med prosjektet i om lag to år. Han bygde først ein liten plastmodell som stod og surra i eitt år. Den fungerte så godt at han bestemte seg for å laga ei mølle i full storleik.

Møllebyggjaren takkar Lid Jarnindustri AS for at prototypen vart bygd. Han er tilsett som laseroperatør i verksemda, og fekk bruka utstyret til arbeidsgjevaren til å byggja mølla. Arbeidsgjevaren har dessutan sponsa stålet han har brukt.

Planen er å installera ein liten generator på mølla og testa den fram til neste sommar. Går testane bra, er neste trinn å leita etter verksemder som ønskjer å produsera møllene.

– Lid Jarnindustri har sjølvsagt førsteprioritet dersom verksemda er interessert. Viss ikkje, trur eg det finst mange andre interesserte verksemder i heile Hordaland. Om alt klaffar, kan dei første møllene vera på marknaden allereie neste sommar, seier Auganæs.

Planlegg hybridmølle

– Det er litt tidleg å spekulera i pris, men eg ser ikkje bort frå at ei mølle vil kosta mellom 200.000 og 250.000 kroner, seier Auganæs.

Planane for neste generasjon er allereie klare.

– Neste steg må vera å produsera møller som har blada dekte med solcellepanel. Då får ein ei mølle som produserer både solenergi og vindenergi, seier han.

Gründeren seier at det ikkje er pengar som motiverer han.

– Eg har ikkje tenkt på pengar i det heile. Eg er oppteken av grøn energi og ønskjer å laga eit alternativ til vanlege solcellepanel. Vind har du natt og dag, medan solcellepanel berre fungerer medan det er lyst.