Tesla toppar i Kvam, Volkswagen i Ullensvang

Også på landsbasis er talet på selde elbilar høgt. 9 av 10 som kjøpte ny bil i 2024, kjøpte ein elektrisk, ifylgje ei pressemelding frå Opplysningsrådet for Veitrafikken (OFV).

Kvemmingane kjøpte 126 nye personbilar i fjor, 25 færre enn året før. Andelen elbilar steig frå 85 prosent i 2023 til 92,86 prosent i fjor. På toppen av nybillista tronar Tesla, med nesten ein firedel av dei selde bilane. Toyota og Volvo fylgjer på plassane bak.

– Trass mange nye merke vel dei fleste bilmerke dei har eit forhold til frå før. I 2025 vert det spanande å sjå om nye kinesiske merke får ein sterkare posisjon blant kjøparane av nye bilar, seier direktør Øyvind Solberg Thorsen i OFV.

Færre nye, fleire brukte

Christoffer Gjerde, salssjef ved Øystese Mek Verksted AS (ØMV), fortel at fjoråret var krevjande i bilbransjen. Det var mindre etterspurnad etter nye bilar, men auka interesse for brukte bilar, seier han.

Totalt selde ØMV 46 nye bilar i fjor. Fordelinga var lik mellom Ford og BYD, medan salet av Suzuki gjekk markant ned, seier Gjerde. Om han samanliknar med åra 2020–2022, er nedgangen i salet truleg på 15–20 prosent, ifylgje salssjefen.

I haust merka Gjerde auka etterspurnad. Då kom tre nye modellar på marknaden. Han har mellom anna selt fleire BYD Sealion 7, som skal leverast til kundar i årets fyrste kvartal. Gjerde trur dei to nye elektriske bilane Ford Explorer og Ford Capri vil hevda seg på bilmarknaden.

– Eg vonar renta betrar seg slik at økonomien vert betre for folk flest. Då vert det kanskje fleire som ser etter ny bil igjen, seier Gjerde.

– Tungt å dra i land

I 2024 kjøpte ullensvangarar 111 nye bilar, ein nedgang frå 121 året før. Nesten 30 prosent av bilane var av merket Volkswagen. Tesla og Volvo er også på pallen i kommunen.

På landsbasis vart det fyrstegongsregistrert 1,4 prosent fleire personbilar i 2024 enn i 2023. 89 prosent av desse var elbilar. For 3. år på rad er Tesla Model Y den mest populære modellen.

Sjølv om ikkje 2025-målet om at alle nye personbilar skal vera nullutsleppsbilar, er nådd, er ingen andre land i nærleiken av så stor del elbilar som Noreg, heiter det i pressemeldinga.

Thorsen seier det er avgjerande at regjeringa stimulerer til kjøp av elbil ved å halda på fordelane om regjeringa og Stortinget skal nå målet dei har sett.

– Tala viser at dei siste prosentane for å nå 2025-målet kan verta tunge å dra i land, seier Thorsen i pressemeldinga.

Ifylgje pressemeldinga har tendensen dei siste par åra vore at folk kjøper mindre og rimelegare nye bilar enn då rente- og prisnivået var lågare.

– Vert tvinga

Dagleg leiar Svein Hogne Børven i Toyota Norheimsund AS seier fjoråret var eit normalår.

– Det var roleg på nybilfronten. Når det gjeld bruktbilsalet, er 2024 det beste året me har hatt.

Ifylgje Børven skjer det ei elektrifisering av marknaden. Han fortel at produsentane får skyhøge bøter om dei går over grensene for utslepp. Salet av elektriske varebilar har hange litt etter salet av elektriske personbilar. Børven seier det er fleire elektriske varebilar på gang. I tillegg til Toyota Proace vil både pickupen Hilux og Land Cruiser koma i elektriske utgåver.

– Sjølv om marknaden ikkje vil, vert kundane tvinga til å velja elektriske bilar. Det er politisk styrt, seier Børven.

Ifylgje han er frykta i marknaden ofte størst for dei som ikkje har prøvd elbil. Dei fleste vert nøgde etter å ha testa. Han fortel at han berre får positive tilbakemeldingar, også når det gjeld køyring på vinterføre.

Børven trur at ein liten rentereduksjon vil gjera at nybilsalet skyt fart igjen.

– Det er psykologi. Går renta ned, kjem kjøpelysta tilbake, seier han.