Terje er isdirektør

Børven studerte internasjonal marknadsføring på Handelshøyskolen BI. Som student var planen å gå i fotspora til faren og verta skipsmeklar. I staden enda Børven opp i matbransjen. Der har han vorte verande.

– Eg har ikkje angra, fortel han.

Både i tida på ungdomsskulen og på vidaregåande skule jobba Børven i butikk. Ifylgje han er det få andre bransjar føresetnadene endrar seg så mykje på så kort tid i. Prisar, råvarer, trendar og etterspurnad – i daglegvareuniverset skjer mykje i høgt tempo.

For fem år sidan fekk Børven jobb som salssjef i Isbjørn Is. No er han dagleg leiar.

– Det er kjempekjekt! Eg er med på å skapa nye produkt og forma bedrifta, seier han.

Alt er relativt

Jobben til Børven handlar framleis mykje om sal. I tillegg har han overordna ansvar for bedrifta og skal sørgja for at alt fungerer.

– Alle dei tilsette har eigne ansvarsområde, men me løyser stort sett utfordringar i fellesskap, fortel Børven.

Isbjørn Is er ei sesongbedrift, og det er stor forskjell på årstidene. Om hausten skal det forhandlast med kundane. Bedrifta leverer is til mellom andre Coop og Rema 1000. På våren må ein produsera og gjera klart til sommarsesongen. I løpet av sommaren brukar Børven mykje tid på logistikk og vareflyt. Han må følgja opp kundane og sørgja for at dei får det dei treng. I tillegg er det viktig å tenkja framover. Bør noko endrast? Skal ein laga nye produkt? Kva skjer med marknaden?

– Kakao kjem til å verta dyrare. Det påverkar sjokoladeprisane. Slike ting må me fylgja med på, fortel Børven.

Likar å eksperimentera

Børven tykkjer det er spanande å testa nye produkt.

– Idear kan koma frå kva som helst. Kanskje ein et ein god dessert og tenkjer at det kunne vorte ein issmak, seier Børven.

Dei tilsette følgjer med på trendar, ser kva som fungerer i andre land og leikar seg med smakskombinasjonar. Det tek som regel eitt år å utvikla eit nytt produkt. Når ideen er skapt, krevst mykje prøving og testing. Dei tilsette smakar og justerer undervegs. Kanskje sender dei smaksprøvar vidare til ein skuleklasse.

– Born er generelt glade i is. Og dei gjev ærlege tilbakemeldingar, seier Børven.

Ein ting er å spørja borna om isen smakar godt. Det er verre å få svar på kvifor han er god eller ikkje. Ja eller nei-spørsmål fungerer ofte bra. Er det for søtt? For surt? For kjedeleg? Kundane må også få prøvesmaka. Etter at produktet er finjustert, kan det endeleg få plass i frysedisken i butikken.

– Det er moro å sjå at folk kjøper det me har laga, fortel Børven.

Vanilje, sjokolade og jordbær er dei mest populære smakane. Favoritten til Børven er karamell.

Is på hjul

Ein må ikkje alltid reisa til butikken for å handla is. Av og til kjem isbilen på besøk. Nokre irriterer seg over kjenningsmelodien hans, medan andre lyser opp og spring etter lyden.

– Det er annleis å handla hjå isbilen enn i butikk, seier Børven.

Ifylgje han har marknaden for isbilen endra seg dei siste åra. Salet var godt under koronapandemien, då folk måtte halda seg heime. No merkast det at folk har mindre kjøpekraft. Bilane er på vegen i heile landet kvar dag. Han kjem innom annakvar veke om sommaren, og ein gong i månaden om vinteren.

Kortreiste råvarer

Fabrikken til Isbjørn Is ligg på Askøy. Der vert 90 prosent av produkta laga. Av og til manglar fabrikken utstyret som skal til. Då skjer produksjonen gjennom eit systerselskap i Latvia. Børven fortel at Isbjørn Is i størst mogeleg grad nyttar råvarer frå Vestlandet. Mjølka kjem frå Tine og syltetøyet frå Lerum.

– Mange vert overraska over at ingrediensane er så kortreiste, fortel Børven.

Isbjørn Is vart oppretta i 1962. I dag har bedrifta 64 fast tilsette. Frå februar til juni er det produksjon heile døgeret for å byggja opp islageret før sommaren. Då trengst det fleire arbeidarar. Bedrifta produserer om lag femti millionar isar i året. Dette utgjer rundt ti prosent av ismarknaden i Noreg.

– Det seier litt om kor mykje is som vert kjøpt her i landet, fortel Børven.