Tel dagar utan hærverk

Ei klokke frå det nedlagde meieriet i Øystese er hovudingrediensen i opplegget til skulen. Rektor Frode Sandven fortel at klokka opphavleg vart nytta til å telja dagar utan arbeidsulukker i meieriet. No har den fått i oppgåve å telja dagar utan hærverk på skulen.

Går det 20 dagar utan at nokon har øydelagt noko, får alle elevane løn for innsatsen.

– Då vert det fanfarar og feiring, og så spanderer skulen frukost eller lunsj på klassane, fortel Sandven.

Om nokon gjer hærverk, vert klokka nullstilt. Det er aktuelt med nye tidsfristar og nye gulrøter.

Planen er at klokka skal henga lenge på veggen.

– Me har ingen planar om å ta den ned til våren eller til sommaren. Så får me sjå om den fungerer og om me treng å bruka den alltid, seier Sandven.

Nybrotsarbeid

Tanken er at klokka skal gjera elevane flinkare til å passa på kvarandre.

– Me ønskjer at dei som vil at skulen skal vera fin, skal gje beskjed til dei som utøver hærverk. Elevane skal hjelpa kvarandre til å nå eit felles mål, fortel Kari Torpe, som er avdelingsleiar for 9. trinn.

«Hærverksklokka» er ikkje eit anerkjent pedagogisk konsept skulen har henta frå andre. Ideen kom frå Karina Berge, som var miljørettleiar ved skulen førre skuleår. Klokka er festa i ei plate laga av elevar på skulen. Den heng lett synleg på ein vegg i multisalen på skulen.

Trist start

Klokka byrja gå torsdag 3. november. Starten vart markert med ei samling i multisalen og kantina på skulen, der både rektor, kontaktlærarar og elevar snakka om kor negativt hærverk er. Mellom anna minte elevrådsleiar Lea Golis om at det vert meir pengar til kjekke ting dersom pengane ikkje må brukast til å reparera hærverk.

Ironisk nok hadde nokon både skrive ukvemsord og teikna hakekors på utsida av skulen natt til dagen før klokka vart sett i gang.

– Det er trist at noko slikt skjer rett før me startar. Me likar ikkje at slike ting skjer, og håpar det ikkje skjer igjen, seier Sandven.