Teken med 2,1 i promille

Mannen tilstod og sa seg skuldig i å ha brote både vegtrafikklova og legemiddellova etter ein køyretur tidleg i haust. Mannen skal, ifylgje dommen, ha køyrt bil frå Øystese til Norheimsund før han vart stogga av politiet. Bilen vart påført skadar under bilturen, utan at den sikta kunne hugsa korleis dei hadde oppstått.

Ifylgje dommen viste ein blodprøve to timar etter bilturen ein promille på 2,11. I bilen fann politiet også narkotiske tablettar.

Mannen er i Hordaland tingrett dømd til 26 dagars fengsel utan vilkår. Han lyt betala ei bot på 65.000 kroner. Han er dessutan fråteken førarretten i to år og to månader, og må ta førarkortet på nytt om han vil køyra bil att.