Tek til orde mot flytting av kraftleidning

Rådmannen føreslår at dei folkevalde i fråsegna frå Ullensvang krev betre vurderingar av bruk av den eksisterande traseen, som alternativ til å ta i bruk nye område med så langt lite rørt natur.

Vidare tilrår han å protestera mot alternativa 1.0, 1.4 og 1.5, som alle vil innebera flytting av lina mellom Mauranger og Jondal monaleg mot vest. Med desse traseane kjem ho både nærare fjorden, inn i område med få inngrep og i nærleiken av fleire stølar. Lina vert dessutan utvida frå om lag 10 til om lag 18 kilometer i Ullensvang.

– Me bør strekkja oss etter å ta vare på dei få urørte områda som er igjen, skriv rådmannen.

Les også:

Han lanserer og kartfestar tre eigne framlegg om mogelege traséval mellom Belsnes og Nordrepollen, og føreslår å be om at også desse vert greidde ut. To av dei fylgjer dagens line til Demmevatnet, før dei tek av i ulike trasear mot aust, i retning mot kraftlina til Fagne AS.

Det siste alternativet hans går frå dagens trasé på Belsnes på sørsida av Torsnesvatnet til Glomsdal og Flatebødalen, før også denne lina går mot Fagne-lina.

– I Ullensvang vil det ha negative konsekvensar for dei som nyttar natur- og fjellområda ved Torsnesvatnet og i Glomsdal. Rådmannen ynskjer at Statnett vurderer framlegget, då det er trekt bak fjella og vekk frå det meste synlege området, skriv han.

Han minner om det ser ut til at temperaturane kan koma til å stiga som fylgje av klimaendringar, og stiller seg i tillegg undrande til det om ikkje Statnett har master og leidningar som toler istilhøva i traseen.

Rådmannen tek elles til orde for å krevja at den aktuelle nye lineføringa vert visualisert, slik at folk kan sjå korleis ho vil ta seg ut frå tre spesifiserte punkt: Torsnes, Grønrimb og Horgi.

Vidare føreslår rådmannen å ta mellom anna fylgjande punkt med i fråsegna:

• Mastene ved og lina over fjorden mellom Belsnes og Ljones må ikkje koma i konflikt med ei eventuell bru som er del av «armen» frå E134 til Bergen.

• Statnett må laga eit oversyn som dokumenterer kor mange gonger den gamle kraftlina har vore ute av drift som fylgje av ising.

• Bruk av sjøkabel må greiast betre ut. Om løysinga vert avvist, må Statnett visa til konkrete vurderingar.

• Det forkasta alternativet 1.8, som går lenger aust enn dagens line og via området mellom Langavatnet og Juklavatnet, må greiast betre ut.

• Statnett må oppgje kor mange rutemeter trasévala råkar og kva for rettleiarar som skal brukast i utgreiingsarbeidet.

Kjernen i grunngjevinga for å flytta kraftlina i Jondal lenger vest er påståtte problem med ising i dagens trasé, som går via Isdalsskardet. Det argumentet møtte kritikk og mistru i folkemøtet om saka i Jondal 13. november.

I saksutgreiinga dreg han fram av søknaden om bygging av Øvre Årvikelva kraftverk vart stogga av styresmaktene. Grunnen skal mellom anna ha vore at tiltaket vil råka eit stort og samanhengande naturområde med urørt preg.