Tek til orde for kjøp på Rossvoll

Som HF skreiv denne veka, har Kvam herad takka nei til eit tilbod om å kjøpa dei snart ledige lokala på Rossvoll. Konklusjonen til administrasjonen var at heradet ikkje treng bygget.

Helland tek før heradsstyremøtet 23. mai til orde gjennom ein interpellasjon for at rådmannen igjen skal vurdera kjøp og oppretta ny dialog med fylkeskommunen. Vurderinga skal vera grunnlag for ei politisk sak om kjøp, ifylgje framlegget.

– Trygt og stille

INP meiner at bygget kan nyttast til mellombelse lokale for Øystese skule når sistnemnde ein eller annan gong skal rehabiliterast. Slik kan ein både sikra trygge og rolege lokale og spara pengar, trur Helland, som framhevar at det er miljøvenleg med gjenbruk av bygningar.

Sidan kan fleire aktørar medverka i drifta, anten som leigetakar eller medeigar, meiner Helland. Konkret nemner han Hardanger AKS AS (HA) som potensiell medeigar. Verksemda kan nytta lokala og sikra drift i Øystese, skriv Helland. HA-styret ynskjer derimot å flytta verksemda til leigde lokale i Steinsdalen.

Dagleg leiar Øyvind Aksnes i Hardanger AKS seier HF at INP ikkje har teke kontakt med leiinga i verksemda for å få innspel i saka. Nyleg opplyste Aksnes til HF at verksemda heller aldri er beden om å vurdera skulelokala i Øystese som alternativ lokalisering.

Helland skriv til HF at han «har inntrykk» av at HA ikkje ser andre løysingar enn flytting til Steinsdalen. Årsaka til at INP ikkje har hatt direkte kontakt med HA, opplyser han, er at partiet ser fleire mogelegheiter for bruk og meiner at det er lite tenleg med dialog før ein har eit handfast alternativ til flytting til Steinsdalen. Også vaksenopplæringa og kulturskulen kan vera aktuelle brukarar, meiner han.

– Ikkje tilrådd enno

Om kort tid vert det avvikla generalforsamling i HA. Der må ny styreleiar peikast ut, etter at Brita Træbakken nyleg trekte seg i protest mot tidsbruken i flyttesaka. Kine Bratli Dale (Ap), som representerer fylkeskommunen, er sett inn som styreleiar inntil vidare.

Helland trur at verksemda med ein ny styreleiar vil få ei meir positiv innstilling til alternative løysingar. Det er tilrådd løysingsorienterte kandidatar som vil finna gode løysingar, hevdar han.

Ordførar Torgeir Næss (Ap) i Kvam herad, som saman med fylkesordføraren og Samnanger-ordføraren er i gang med arbeidet med å finna eigna kandidatar, opplyser derimot at nemnda enno ikkje har gjeve tilråding om kven som skal sitja i styret.

Parallelt med interpellasjonen har Helland stilt rådmannen og ordføraren fleire spørsmål om den same saka. Han vil vita om dei ser på Kvam vidaregåande skule som mogelege mellombelse lokale for Øystese skule, og om dei i så fall burde ha hatt dialog med fylkeskommunen om overtaking. Han spør dessutan om dei ikkje såg på tilbodet om kjøp av skulen som prinsipielt nok til at det burde ha vore handsama av heradsstyret.