Tek til orde for innvendingar

Som HF skreiv nyleg, har ikkje fylkesdirektøren lagt stor vekt på strekninga mellom Rosendal og bergenstraktene i framlegget til fråsegn om planane om oppgradering av kraftlina frå 300 til 420 kilovolt.

For medan lokale krefter i Jondal har samla seg både på Torsnes og Kysnesstrand for å protestera mot ei kraftline lenger vest og nærare fjorden, er strekninga mellom Mauranger og Samnanger knapt omtala i den administrative saksutgreiinga.

Det ynskjer Handegard å gjera noko med får politikarane handsamar saka denne veka. Ho ynskjer å justera eit punkt i framlegget som i utgangspunktet berre handlar om alternativa nær Rosendal, slik at det dreiar seg om heile strekninga frå Rosendal til Ljones.

Framlegget ho ser føre seg, er å påpeika at kraftlina i området råkar fleire landskapsvernområda og innfallsportar til Folgefonna nasjonalpark, og dessutan det ypparste fjordlandskapet i Noreg.

– Det er eit paradoks at føreslegne trasear har langt større konsekvensar for natur, landskap, lokalmiljø og artsmangfald enn linja frå 60-talet som skal erstattast, heiter det i framlegget.

Handegard vil føreslå at fylkeskommunen skal be om at den eksisterande traseen i langt større grad vert eit alternativ som vert greidd ut, og at sjøkabel forbi Rosendal og kryssing av Maurangerfjorden og Hardangerfjorden vert vurderte i kombinasjon med gjenbruk av dagens trasé. Til sist nemner ho i framlegget at linevalet for fjordkryssinga mellom Belsnes og Ljones må vera avklara med vegstyresmaktene for å hindra konfliktar med ei eventuell bru i området.

Hovudutval for næring drøftar saka tysdag 21. januar, før fylkesutvalet kastar seg over saka torsdag 23. januar. Fristen for å uttala seg om dei såkalla meldingane frå Statnett gjekk ut 16. januar, men fylkeskommunen har fått utsetjing.