Tek til orde for å fjerna hyttefelt i Mælsheiane

Det går fram av eit drøftingsgrunnlag som styringsgruppa for arealdelen av kommunen tek stilling til tysdag 16. august.

Rådmannen meiner at dei to rette stadene å satsa på nye hytteområde er Seljestad og Håradalen, som frå før er massivt utbygde og i dag har i alt 400 ledige, regulerte hyttetomter i fjellet.

På strekkja Herand–Hessvik, eit anna viktig hytteområde med stort sett sjøhytter i Ullensvang, finst ifylgje oppteljinga til rådmannen 225 ledige tomter. Reserven er så stor at rådmannen meiner ein ikkje treng leggja til retta for nye, men heller bør utvikla dei som allereie finst.

Ottast erstatningskrav

Han vil, i tråd med innspel frå grunneigarar på Flatabø i Øvre Krossdalen, fjerna uregulerte hytteområde i nærleiken av Vassdalsvatnet som ligg i kommuneplanen for Jondal. Også fjerning av eit hyttefelt på Nysundsletta ved Svåsand legg rådmannen opp til å drøfta.

I tillegg tilrår han å fjerna i alle fall det eine og minste av to hstore ytteområde på oppsida av vegen i Mælsheiane ved Herand. Dette er uregulert, i motsetnad til det mykje større naboområdet, som vart regulert som del av Heiane hyttefelt på 1980-talet. Rådmannen meiner at det vil vera i tråd med dei vedtekne prinsippa for fritidsbustader å fjerna båe områda, og meiner det bør drøftast politisk. Han vil ikkje gjera det før kommuneadvokaten har vurdert om det kan utløysa erstatningsplikt å ta ut eit regulert område og oppheva reguleringsplanen.

Om alt vert stroke, vil det vera i tråd med ynska frå fleire som har kome med innspel til planen. Mellom dei er Forum for natur og friluftsliv (FNF), som attåt å protestera mot gondolbane til Rossnos og oppdrett i indre Hardanger fremjar innvendingar til hytteområdet ved Mælen. FNF meiner at områda framstår som urørt natur, og at nye hyttefelt ikkje bør stikka hol på nye naturområde.

Jondalspolitikarane, som ifylgje rådmannen i Ullensvang ikkje har hatt nokon overordna strategi bak hytteplanlegginga, får i den samanhengen eit spark på leggen.

– Arealplanlegginga i Mælsheiane brukar me som eit konkret døme på korleis me meiner at framtidig hytteutbygging ikkje bør skje, skriv FNF.

Opna for veg

Det er altså to unytta område for fritidsbustadene i Mælsheiane, som kverrset til saman 421 mål. Det meste ligg på oppsida av vegen til Mælen. Område ligg inntil einannan. Det eine er som nemnt regulert, men ikkje utbygt.

I den gjeldande kommuneplanen for Jondal heiter det at i det eine området, FB1, som ligg nærast Mælen, og i den «vestlege delen av» av det andre området, FB, skal ein ta vare på «området sin spesielle landskapskarakter og vegetasjon» og unngå køyre- og gangvegar.

I område med eksponert fjelloverflate skal bygningar ikkje medføra terrenginngrep. I den «austlege delen» kan ein byggja veg frå Mælsvegen og byggja interne vegar og leidningsgrøfter som er tilpassa til terrenget. Kvar grensene går mellom den vestlege og austlege delen, er ikkje definert nærare i føresegner eller plankart i den overordna planen.

Kommuneplanen opnar for eit utbygt areal per tomt på inntil 190 rutemeter i den austlege delen av FB2. I resten av feltet og i FB1 er det opna for inntil 100 rutemeter.

Både for og mot

I alt er det kome 75 innspel til planarbeidet som handlar om fritidsbustader. Ein god del av dei handlar om Mælen, det vera seg akvakultur eller hytter.

Grunneigar i FB1, som altså kan verta fjerna, Arne Bakke Mælen, har i eit innspel teke til orde for å vidareføra hyttefelta, men å ta ekstra omsyn til det unike landskapet gjennom minst mogeleg terrenginngrep og mest mogeleg naturbaserte løysingar.

Fleire hytteeigarar i det allereie utbygde hyttefeltet nedom Mælsvegen har derimot bede om at både FB1 og FB2 vert strokne og gjorde om til landbruks-, natur- og friluftsområde, fyrst og fremst på grunn av naturverdiar. Ein som bur i området, Dag Rune Skarstein, meiner utbygging vil få stor fjernverknad i ein sårbar topografi – mykje større enn hyttene som allereie er bygde i Heiane hyttefelt nærare sjøen – og vil medføra terrenginngrep som ikkje kan gjerast om og vil vera til skade og alvorleg på mange nivå.

Dei andre råka grunneigarane er Hanne E. Hesthamar og Hans Georg og Gunnhild Helene Røstbø.

I alt tilrår administrasjonen fjerna 11 hyttefelt på til saman kring 1.800 mål i kommunen. Desse er areal som ligg langt frå veg og annan infrastruktur, som er i strid med prinsipp politikarane har vedteke (sjå faktarute) eller som grunneigarar ynskjer vekk.

I det store og heile tek rådmannen til orde for å fortetta og utvikla eksisterande hytteområde heller enn å opna for nye.