Tek sjølvkritikk for hemmeleghald
Ei rekkje dokument utveksla mellom partane som har forhandla om ny avtale om drift av Hardangerbadet, dukka opp fyrst då HF etterlyste dei.
Mellom Hardangerbadet AS og Kvammabadet har det vore utveksla ymse dokumentasjon i forhandlingsprosessen: innkallingar, presentasjonar, møtereferat og økonomiske talgrunnlag.
Ikkje greitt
HF har ved ei rekkje høve sidan etableringa av føretaket mint Kvammabadet på plikta etter arkivforskrifta til å journalføra dokument. Kommunale føretak er nemleg underlagde både arkivforskrifta og offentleglova, som skal sikra ålmenta innsyn.
Men fyrst då HF etterlyste dokumenta frå forhandlingane i oktober, vart ein del dokument, som er utveksla mellom partane, journalførte av dagleg leiar Tom Rasmussen.
Han har sidan drøfta rutinane med arkivleiar Trude Birknes Buene i Kvam herad. Rasmussen og styreleiar Reidun Skålheim Solberg vedgår at dei ikkje har hatt god nok kunnskap om skilnaden mellom journalføring og offentleggjering av dokument. Men sjølv om dokumenta hadde vorte journalførte, er det ikkje sikkert at dei hadde vorte offentlege ettersom dei var del av ei pågåande forhandling, påpeikar dei.
Offentleg etter glipp
Då saka vart drøfta av styret 21. august, ynskte ikkje Kvammabadet å offentleggjera sakspapira til styremøtet, men Kvam herad gjorde ein feil og la dei ut på postlista i om lag eitt døger. Dimed fekk HF og andre som kom over dei den perioden dei låg ute, uforvarande tilgang til dei.
Grunngjevinga for hemmeleghaldet var ifylgje leiinga i Kvammabadet at offentleggjering kunne skada forhandlingsposisjonen til Kvam herad. Det synspunktet sette ordførar Torgeir Næss (Ap) spørjeteikn ved i styremøtet i august, ettersom dokumenta er utarbeidde i «dialogmøte» med representantar for forhandlingspartane.
– Her er alle korta viste til alle partane frå før, sa han.
Rasmussen påpeika at innhaldet ikkje var formelt handsama og godkjent av dei respektive styra, og at ikkje alt innhaldet i saksdokumenta var kjent for dei andre partane i saka. Styret vart bak lukka dører samd om å likevel offentleggjera dei fleste dokumenta i saka, med unntak av nye krav det ville stilla til motpartane.
Sakspapira til styremøtet i Kvammabadet 22. oktober vart tilgjengelege måndag 14. oktober. Det er seks dagar etter den vedtektsfesta fristen på 14 dagar før møta. Solberg bad i møtet om orsaking for seinkinga. Styreleiaren forklara overskridinga med at det var ei omfattande sak der det skjer mykje, og at det var viktig å kvalitetssikra informasjonen.
