– Tek på meg vestlandshatten

Dyveke Buanes vert redaktør for nye NRK Vestland når NRK Hordaland og Sogn og Fjordane vert slegne saman frå 1. januar. Ho har stor tru på at samanslåinga kan betra journalistikken og vera med på å skapa ein felles identitet i det nye fylket.

– Eg er både stolt og audmjuk, og tenkjer no at alle dei flinke folka i NRK Sogn og Fjordane og NRK Hordaland skal verta til superlaget NRK Vestland. Det er veldig gode moglegheiter i samanslåinga, så om me spelar korta våre riktig, kan det bli kjempebra, seier Dyveke Buanes til Nynorsk pressekontor.

Sidan 2017 har ho vore redaktør for NRK Hordaland, men når kontoret saman med NRK Sogn og Fjordane frå 1. januar vert til NRK Vestland, vert ho redaktør for heile det nye Vestlands-kontoret. Redaksjonen vert framleis i Førde og Bergen, men med tettare journalistisk samarbeid og felles redaktør.

– Eg tek av meg bergenshatten og på meg vestlandshatten, seier Buanes om den nye rolla.

Ho er veldig bevisst på at ein no skal dekkja eitt felles fylke der alle delane er like viktige.

Rune Møklebust, fungerande regionredaktør i NRK region vest, gler seg til å sjå at visjonane for det nye kontoret vert sette ut i livet.

– Dyveke, som ein ambisiøs, nytenkjande og målretta redaktør, og Terje Gilleshammer, som med si drivande kraft og faglege tyngd kjem til å vera ei skikkeleg god samlande kraft for det nye kontoret, skriv han i ein kommentar til NPK.

Lang tradisjon for samarbeid

Dei to kontora har allereie ein lang tradisjon med ein felles vestlandsrevy på tv. Frå nyttår held dei to kontora fram med eigne radiosendingar, men med meir samarbeid og fleire samsendingar når det er journalistisk relevant. På nett får dei ein ny, felles front.

– Me har kjempeflinke reporterar og folk i både Hordaland og Sogn og Fjordane. Målet er ein felles reportarpool, der ein kan byggja sterkare fagkompetanse. Me såg det allereie i haust ved valet, der Erlend Blaalid Oldeide i Førde gjorde ein fantastisk jobb med å spørja ut dei folkevalde i fylket, men etter å ha utveksla kunnskap med Sølve Rydland i Hordaland, seier Buanes.

Ho ynskjer eit samarbeid der journalistane finn kvarandre fagleg, snakkar saman og spelar kvarandre gode.

– Saker i heile Vestland kjem til å bli meir relevant for alle i heile fylket, og vi er einaste mediehuset som dekkjer heile nye Vestland. Om det er ein vidaregåande skole i Etne som skal få meir økonomisk støtte, blir det òg relevant for Måløy eller andre delar av fylket fordi dei deler same budsjett, seier Buanes.

Arbeid med å bli kjent

– Kva er den største utfordringa med ei samanslåing?

– Det er sjølvsagt arbeid som skal gjerast med å verta kjent. Vi må bruka tid. Lokalkontora i både Sogndal, Nordfjordeid, Stord og Odda vert òg veldig viktige framover. Me skal få til fagnettverk mellom dei og at dei kan få støtte i kvarandre.

Noverande distriktsredaktør i NRK Sogn og Fjordane, Terje Gilleshammer, går over i stillinga som redaksjonssjef for fordjuping og samarbeid. Han vert sentral i arbeidet med å få til eit godt samarbeid og ein god journalistikk i heile vestlandsfylket.

– Han er ein god lagspelar eg trur vert avgjerande for at me skal lakkast med å laga dagsordensetjande journalistikk, seier Buanes.

Har tru på nynorsken

Målrørsla har ytra bekymring for den samla delen nynorsk i NRK når NRK Sogn og Fjordane, som nesten berre skriv nynorsk, blir slege saman med bergenskontoret. Buanes deler ikkje bekymringa for at det vert mindre nynorsk totalt, og strekar under at det er noko dei jobbar godt med i Hordaland.

I haust fekk hordalandskontoret den mindre kjente utmerkinga «Smågodtposen» av konstituert språksjef i NRK, Ingvild Bryn.

– Posen er ein haug med smågodt fordi me har klart å ta eit krafttak for å få opp nynorskprosenten. Det er teikn på at me tek det på høgaste alvor, seier Buanes, som har tru på at NRK i år kan nå målet om 25 prosent nynorsk.

NRK Hordaland har dei siste 90 dagane nådd ein nynorskprosent på 54, og i november var delen nynorsk på 57 prosent.

– Me har eit veldig bevisst forhold til nynorsk i Hordaland; det er viktig for oss. Hordaland er distriktskontoret som leverer flest saker til NRK-fronten, og då meiner me at me er med på å auka den totale prosenten i NRK.

Men ho trur det ville vore unaturleg dersom heile bergenskontoret skulle ha skrive nynorsk.

– Eg sit i bokmålsbyen Bergen og kan ikkje lova at me får 100 prosent nynorsk. Men me har eit fokus på at det er veldig viktig.

– Vestland kling bra

Buanes trur ikkje at ho vert nokon autoritær sjef.

– Eg trur eg er ein lydhøyr sjef. Eg vil at me skal få til noko, og skjønar at det ikkje kjem av seg sjølv, men at utviklinga og tilliten kjem over tid.

Ho medgjev at prosessen med å slå saman kontora har vore både mentalt krevjande og kravd mykje arbeid. No har prosjektet mogna.

– Eg synest NRK Vestland kling bra, og eg trur me på lang sikt vi vil få bygd opp ei fellesskapskjensle rundt at me er eitt Vestland. No gler eg meg til å setja ut i livet det me har snakka om, og ivrar etter å vise kva me skal få til saman, seier sjefen for NRK Vestland.

NPK