Tek opp universell utforming ved skule
Marit Heidi Seim reagerte då ho las i HF at ikkje alle kan nytta hovudinngangen til den nye skulen i Kvam.
Seim er medlem i rådet for menneske med nedsett funksjonsevne i Kvam. Ho undrar om og eventuelt korleis representantar for menneske med nedsett funksjonsevne har vore involverte i avgjerda om eit brattare inngangsparti utanfor inngangen enn det byggteknisk forskrift føreset. HF omtala saka tidlegare i august.
Seim har teke saka opp med Trude Brosvik (KrF), som er fylkestingsrepresentant og leiar for rådet for menneske med nedsett funksjonsevne i Vestland fylkeskommune. Brosvik har stilt spørsmål om saka til fylkesdirektøren. Ho ynskjer å vita om det er korrekt at inngangen ikkje vert universelt forma, om ein kan dispensera frå slike krav for nybygg, og korleis brukarmedverknaden har vore i saka.
– Eg kan nesten ikkje tru at dispensasjon frå lova om universell utforming vert vurdert. Inkludering eller ekskludering, likestilling eller diskriminering – kor står dei ansvarlege? Kan me stola på at alle får det dei har rett på? skriv Brosvik.
Fylkesdirektøren må svara på spørsmåla hennar i møtet i fylkesutvalet torsdag 22. august. Brosvik fortel til HF at saka i tillegg kan verta teken opp i møtet i rådet for menneske med nedsett funksjonsevne fredag 23. august.
Det var i eit møte mellom Norconsult AS, Kvam herad, fylkeskommunen og Veidekke Entreprenør AS 25. juni saka vart teken opp. Ifylgje møtereferatet er årsaka til ynsket frå Veidekke Entreprenør «makeskifte og kostnadane med reforhandlingar av makebyte». Det vart òg påpeika at ein brattare veg vil gjera snørydding ned mot Iversen-bygget enklare og opna for eit ynskt «grøntanlegg».
Ifylgje referatet konkluderte rådmannen, som var representert av ikkje færre enn fire personar i møtet, med at endringa er søknadspliktig. Søknaden skal handsamast av rådet for menneske nedsett funksjonsevne 17. september. Ifylgje referatet frå junimøtet er planen å starta bygginga av gangvegen kring oktober.
Kva som hender om rådet set foten ned kort tid før oktober og krev universell utforming i form av ei stiging på maksimalt 1:15 på ein «slangeforma» veg, seier dokumentet ingenting om.
Inngangen til skulen på nordsida vil framleis vera universelt forma. Der har utbyggjaren flytta på fleire parkeringsplassar for funksjonshemma for å få dei nærare inngangen og betra stigingstilhøva.
HF spurde fredag rådmann Anita Hesthamar og innleigd prosjektleiar Bjarte Rasmussen korleis Kvam herad har medverka i spørsmålet om universell utforming, og korleis brukarar har vore representerte i diskusjonane. Dei hadde måndag ettermiddag ikkje svara på spørsmåla.
