Tek opp kampen mot viruset
Ullensvang kommune har starta vaksinasjon mot koronaviruset.
Kommunen byrja 7. januar vaksinera bebuarar på institusjonane. Utneheimen, Vikevollen i Jondal og langtidsavdelingane på Bokko var fyrst ut.
Når vaksineringa av bebuarar på institusjonar og omsorgsbustader er ferdig, vil kommunen byrja vaksinera resten av innbyggjarane.
Det kjem vaksinar til kommunen kvar veke. I veke 1 tok kommunen imot 40 dosar. I veke 2 er det varsla mottak av 60 dosar.
Alle personar i målgruppene som bur eller oppheld seg mellombels i Ullensvang, vil få tilbod om vaksine. Kommunen vil kontakta alle etter kvart som dei aktuelle gruppene skal vaksinerast.
Ullensvang kommune baserer seg på råda frå FHI når det gjeld kven som skal prioriterast først til vaksinasjon.
Helsepersonell skal vaksinerast parallelt frå og med veke 2.
Personar som bur på institusjon eller i omsorgsbustad med heildøgnspleie, vil få tilbod om å ta vaksinen der dei bur. Nokre innbyggjarar med vedtak om helsetenester i heimen vil få tilbod om å ta vaksinen i heimen.
Når ein startar opp med vaksinasjon av resten av innbyggjarane vil Tyssohallen vera vaksinasjonsstad, på grunn av omfanget og forholdsreglane.
Kommunen veit enno ikkje når ein kan byrja med massevaksinasjon.
