Tek kundane med på feiringa av overskotet
Sparebanken Vest gjev i gjennomsnitt 2.000 kroner i utbyte til kundar i Kvam og Jondal.
Banken la onsdag fram eit rekordsterkt resultat for 2021 på 3.055 millionar kroner før skatt. Det går fram av ei pressemelding frå avdelingsbanksjef i Kvam, May Turid Tømmervik.
— Auka optimisme mellom både folk og verksemder på Vestlandet er ein viktig drivar for det gode resultatet, skriv Tømmervik.
Kundar med lån og innskot i banken vil få sin del av overskotet, nærare bestemt 390 millionar kroner. Til saman 13.344.175 kroner vil verta fordelte på 6.715 kundar i Kvam og Jondal, i snitt 1.987 kroner.
Styret i Sparebanken Vest føreslår òg at 335 millionar kroner skal gå til ålmennyttige tiltak som idrettslag, organisasjonar, frivillig innsats og omstillingsprosjekt.
Kundeutbytet vert utbetalt i april, medan ålmennyttige tilskot vert delte ut gjennom året. Kundeutbytet er ein del av overskotsdisponeringa til banken, og vil verta formelt handsama av generalforsamlinga i mars.
Tømmervik melder elles at ho torsdag kunne kontakta 3 lag som får tildelt pengar. Frå Eldsjelfondet får Hardanger Skyttarlag 38.000 kroner. Frå Koronafondet får Lydia 17.500 og Øystese Næringslag 45.000 kroner.
