Tek imot 45 flyktningar: – Ikkje villig til dugnad
– Medan me sit her og er privilegerte og drøftar naturvern og bompengar, er det nokre som døyr og mistar familien og alt dei eig.
Kari Mostad (MDG) teikna dei store linene då omfanget av flyktningar i år vart drøfta av heradsstyret torsdag 9. februar. Ho tok til orde for å strekkja seg langt for å hjelpa fleire enn dei 45 flyktningane rådmannen meiner kvemmingane kan handtera i år.
– Det er ei stor humanitær krise i Europa. Eg har all respekt for jobben dei tilsette gjer, men om me ser problema berre her, går det ikkje opp. Me må tenkja annleis og kreativt og sjå på mogelegheitene, sa Mostad.
– Det er bra, men me slit med å få tak i folk. Det er ikkje me, men dei tilsette som gjer jobben. Eg trur ikkje behovet vil gå over. Det kjem mogelegheiter, sa Bjørgulv Hauger (Frp).
Les også:
Mindretal for 60
Berre MDG ville gjera som styresmaktene ynskjer og busetja 90 i år. Då framlegget fall, slutta partiet seg saman med SV, KrF og Ap til eit framlegg frå R om å ta imot 60. Fleirtalet – H, Frp og Sp – nøgde seg med 45.
Johanne Neteland (Sp) viste til at det er utfordringar med mellom anna arbeid, bustader, språkpraksis og ansvarsfordeling. Ho minte om at innstillinga frå rådmannen om 45 flyktningar – ein auka på 15 frå budsjettvedtaket – byggjer på faglege vurderingar av kapasiteten. Etter hennar syn vil dei tilsette også med 45 flyktningar vil strekkja seg langt. Parallelt vil Sp arbeida med å auka kapasiteten, forsikra Neteland.
Lisbeth Fredheim Oma (KrF) har forståing for vanskane med å få tak i nok tilsette, men meiner den internasjonale situasjonen krev ein dugnad som alle må delta i.
– Eg er ikkje villig til dugnad på jobb. Me får ingen som søkjer på stillingar i Kvam. Me går i spagat. Me er avhengige av at nokon kan ta imot. Det må me ta inn over oss, sa lærar Kari Torpe (Sp).
– Kvam er større
Eit framlegg frå H om å grunngje valet mellom anna med dårleg kapasitet i skulen i Norheimsund og Øystese fekk Halvard Lilletveit (Ap) til å reagera.
– Det er veldig rart å avgrensa det til Norheimsund og Øystese. Kvam er større enn det, sa han, og minte om at det truleg er ledig fysisk kapasitet både i Ålvik, Tørvikbygd og Strandebarm.
Randa ville i tillegg argumentera med at oppbevaring av kontantar, som er naudsynt i samband med nye flyktningar, er risikabelt. Oma synest grunngjevinga er merkeleg, ettersom det må gjelda også dei 45 flyktningane Randa vil ta imot.
Tillegget med argumentasjon frå H fekk berre støtte av Frp.
