Tek hardangermat til hovudstaden
Kokk Espen Nordset Raknes har fått i oppdrag å skipa til julebord i Oslo.
Han er dagleg leiar i cateringverksemda Barmen AS på Omastrand.
Selskapet på Frogner rommar 18 personar hjå ein kunde som Raknes har hatt på Eikenes fast om hausten i seks år.
– Dei har kome attende og valt å bruka oss jamt og trutt. Dei var så nøgde at dei inviterte oss over fjellet, seier Raknes.
Gjestene er på jakt på Vestlandet to helgar kvar haust, og nyttar høvet til å eta på herregarden på Eikenes.
Tradisjonell hardangermat
Selskapet vert lite og intimt, og gjestene ynskjer mat frå Hardanger. Raknes kjøper inn råvarer frå lokale produsentar og tek med seg til hovudstaden.
– Er det godt betalt?
– Ja, dei set pris på kvalitet.
Han køyrer bort 23. november. Så vert det gilde torsdag, og fredag reiser han heim att for å førebu julebord i Hallvardsnaustet.
– Full rulle, konstaterer han.
Austlendingane vil få servert pinnekjøt, svineribbe og ein buffé med kald julemat. Til dessert serverer Raknes «sommarens beste plommer» av typen Reeves, leverte av Annhild Oma i Oma Eple.
Lokale leverandørar
Leverandørane til Raknes er mellom andre Nortura SA, Hardangerlam, Homlagarden AS, Godt Lokalt AS, Hauane Hagebruk, Hagen på Nes og Breievne Gard.
Med på turen over fjellet vert gode knivar. Raknes køyrer ein kassebil til Austlandet.
– Osloturen vert spanande. Eg vurderte å fly, men då måtte eg ha sprunge rundt og handla alt i Oslo. Og då ville litt av poenget vore vekke. Litt av sjarmen er å visa kva me kva me gjer til kollegaene der borte, seier han.
Raknes tilbyr den same menyen på lokale, opne julebord 3. og 10. desember.
Fredag 18. november skipar han til lutefisklag, ein tradisjon i Hallvardsnaustet. Det har ikkje vorte arrangert på eit par år. No vert det meir i kommersielt siktemål, seier Raknes. Laget er ope for alle.
