Tek grep for å redusera nasking

Skulen har vorte kontakta av butikksjefen på Coop Extra i Øystese. Han melder at talet på elevar som naskar i butikken i har auka, fortel rektor Kari Ljones.

Difor har Ljones teke ein runde i klasseromma og oppmoda elevane om å slutta å stela. Ho fortalde òg at butikken no kjem til å byrja melda elevar som stel til politiet.

Ljones oppmoda òg elevane om å slutta å gå i butikken i store grupper.

– Om elevane ikkje har tenkt å kjøpa noko, bør ein ikkje gå meir enn to og to saman. Me har sjølvsagt ikkje høve til å påleggja elevane dette, men det er ei oppmoding frå vår side, fortel ho.

Ei melding om naskinga er send til alle føresette. I meldinga oppmodar Ljones foreldra om å ta ein prat med dei unge om det å stela og kva konsekvensar det kan få.

Politioverbetjent Andor Helgheim ved Kvam politistasjon fortel at om ein ser på talet på melde saker, ser ikkje nasking i butikkar ut til å vera eit stort problem i Kvam.

– Men her er det nok store mørketal. Mange butikkar melder ikkje slike saker til politiet fordi det er mykje jobb i forhold til kva dei får att, seier han.

Dei under 15 år kan ikkje straffast. Om ein ungdom over 15 vert meld for nasking, vil vedkommande og føresette bli kontakta av politiet. Saka kan løysast i eit konfliktråd dersom både ungdomen og den offeret er samde om det.

– Elles får saka strafferettsleg handsaming. Utfallet varierer frå sak til sak. Førelegg kan vera eit alternativ, seier Helgheim.