Tek eit steg vekk frå det fossile
Esso-stasjonen i Øystese tilbyr ikkje lenger berre bensin og diesel. Den siste tida har også dei som køyrer elektrisk, kunna «fylla tanken».
Øystese Mek. Verkstad AS eig Esso-stasjonen. Styremedlem Christoffer Gjerde fortel at ladestasjonen, som fylte dei første batteria i starten av november, er den første såkalla lynladestasjonen i Øystese.
Den er også den ladestasjonen i Kvam med høgast ladeeffekt. For medan stasjonane Tesla og Eviny har i Norheimsund tilbyr 150 og 200 kilowatt, leverer stasjonen i Øystese ein effekt på 225 kilowatt. Effekten er så høg at Kvam Energi Nett AS måtte byggja ein ny trafostasjon for å få nok straum.
– Skal lokka kundar
Recharge AS eig stasjonen og får mesteparten av inntektene frå kraftsalet.
– Me har ansvaret for å gjennomføra inspeksjonar kvar veke, og halda det ryddig og fint rundt stasjonen. Me har ikkje hatt utgifter med bygginga, men våre inntekter er samstundes minimale. Recharge betalar eit lite vederlag for kvar kilowatt som vert seld, seier Gjerde.
Likevel tok Øystese Med. Verkstad initiativet til å få ein ladestasjon.
– Inntektene frå sal av bensin og diesel går nedover. Målet med ladestasjonen er å få fleire kundar inn i butikken, seier Gjerde.
Sjølv om stasjonen er ein lynladar, ladar den ikkje lynkjapt. Om ein har 10 prosent på batteriet, tek det fort 30 til 40 minutt før batteriet er 80 prosent ladd.
– Dermed får bilistane god tid til å få seg noko å eta eller drikka i butikken, seier Gjerde.
– Stengjer ikkje pumpene
Då HF snakka med Gjerde, hadde han ikkje tal som synte interessa for den nye ladestasjonen.
Han ser ikkje bort frå at ladestasjonen etter kvart vil verta utvida, men trur likevel det er ei stund til alle pumpene er bytte ut med ladekablar.
– Eg trur me vil halda fram med å selja bensin og diesel i mange år. Fleire og fleire privatbilar vert elektriske, men når det gjeld nyttebilane, står det framleis mykje att, seier han.
