— Teieplikta hindrar deltaking

Mellom dei som initiativtakar Dan Børve har invitert, er representantar for Skeiv Verden Vest, Hordaland Fri, Trans Ungdom, ein forelder til eit barn med gjennomgått kjønnsinkongruens, ein spesialpedagog, ein psykolog og som nemnt heradet. Debattleiar i Kabuso vert transkvinna Tonje Havstad.

Hovudtemaet for debatten er korleis ein kan få eit betre og meir inkluderande bygdesamfunn i Kvam. Havstad meiner at om heradet kunne delteke, kunne det ha roa og tryggja dei som er redde for å stå fram som skeive.

Rådmannen har altså avslege invitasjonen. Ho skriv i tilbakemeldinga at det korkje er å få ros eller unngå kritikk som er grunngjevinga for standpunktet. Tilsette i Kvam herad kunne ikkje ha delt røynsler som gjeld temaet, på grunn av teieplikta, skriv rådmannen. Det ein kunne ha bidrege med, var generell informasjon i form av materiell eller eit innleiande innlegg. På grunn av knapp tid får ein ikkje til dette i år. Rådmannen føreslår at ein ser på eit informasjonsarbeid til neste år, i god tid før neste arrangement.

Ho skriv at når det gjeld føremålet med debatten om å tryggja born og vaksne frå diskriminering, synest ho at det høyrest ut som om Bygdapride alt har fått samla ei god gruppe som er rause og kan dela av sine personlege erfaringar.

Havstad skriv at ho har registrert skryt av korleis Kvam herad har handtert transborn. Ho har òg fått høyra bekymringar frå familiar som er ottefulle for korleis desse borna vil verta mottekne som opne skeive.

— Det finst skeive i Kvam som lever i skjul sjølv for sine næraste, skriv Havstad til heradet.

Bygdapride skriv til heradet at Skeiv Verden tilbyr seg å besøkja ungdomsskulane i Kvam i veka før Bygdapride for å informera om Pride og LGBTQA+.

Rådmannen svarar at dette kan vera aktuelt. Heradet vurderer å ta besøket inn i eit fast system der helsesjukepleiar òg tek del, men det er ikkje mogleg å få på plass før arrangementet 17. september.