Tapa sak om eigedomsskatt

Tolo eig ei leilegheit i sameiget Tolo Terrasse i Norheimsund. Då han i februar 2021 såg korleis heradet hadde rekna ut eigedomsskatten i sameiget, klaga han på vedtaket på vegner av alle eigarane i bygget.

Klagen vart fyrst delvis teken til fylgje, men sameiget meinte seg framleis urettvist behandla. Klage nummer to vart avvist av heradet. Då dialog og sakkunnig klagenemnd ikkje førte ikkje fram, sende Tolo stemning til tingretten i fjor haust.

– Alt eigt av alle

Hordaland tingrett tok stilling til usemja om eigedomsskatten i midten av mai, og frikjente Kvam herad. Tolo vart dømd til å betala sakskostnader på om lag 5.000 kroner.

I berekninga av eigedomsskatten tok Kvam herad utgangspunkt i det samla bruksarelaet i bygningsmassen, som vart delt på dei 12 leilegheitene. Ifylgje domen meiner Tolo at det berre skal betalast eigedomsskatt av arealet av kvar leilegheit og ei tilhøyrande bu, og ikkje for bruksareal som til dømes felles trapper, korridorar og garasje.

Det viktigaste spørsmålet for tingretten var om heradet hadde fylgt lova og eigne retningsliner. Det har heradet gjort, ifylgje domen. Heile eigedomen er eigd av sameigarane i fellesskap, påpeikar tingretten.

– Dette er i prinsippet likt som når ein einebustad vert eigd av to ektefellar i sameige eller når ein fritidseigedom vert eigd av ei gruppe slektningar i sameige, skriv tingretten.

Ulik handsaming

Også handsaminga av ulike sameige i heradet er ulik, meiner Tolo. Utrekninga av eigedomsskatten for ei anna leilegheit han eig i Kvam, har teke utgangspunkt i bruksarealet multiplisert med sjablongtaksten. Sjablongbasert taksering er verdi sett på bakgrunn av bruksareal og prisar for den typen eigedom i same område.

Ifylgje Tolo er dette ein praksis som heradet har fylgt tidlegare. Retten påpeikar at det er dagens retningsliner – sist oppdaterte i 2021 – som gjeld.

Det har ikkje vore forskjellsbehandling, ettersom det store fleirtalet av eigarseksjonssameiga i heradet har vore skattlagde på same måte, står det i domen. Ifylgje heradet er sameiget Tolo siktar til, det einaste sameiget i Kvam der skattegrunnlaget er rekna på ein annan måte enn resten av sameiga. Den andre leilegheita utgjer med andre ord eit unntak eller avvik.

Vedtaket er ikkje i strid med eigedomsskattelova, og står ikkje fram som vilkårleg, usakleg eller urimeleg, meiner retten.

Tolo seier til HF at han ikkje kjem til å anka domen. Han opplyser at han parallelt med stemninga har vore i dialog med heradet om berekninga og fått retta opp i nokre feil i taksten til sameiget. Målet var å oppnå ein kostnadsreduksjon på om lag 40 prosent. Rettingane gav ein kostnadsreduksjon på om lag 20 prosent, fortel han.