Tala bompengar midt imot

— Å betala over 200 kroner for å sleppa å få stein i hovudet, er hårreisande. Bokstavleg tala.

Med mellom anna desse orda argumenterte varaordførar Frode Nygård i Kvam på landsmøtet til Frp i helga, eit møte som fekk mest mediemerksemd på grunn av leiarbytet.

Landsmøtet vedtok eit framlegg til resolusjon om temaet frå Vestland Frp. I denne tek partiet avstand frå bompengefinansiering av ras- og trafikksikringsprosjekt.

— Me skal ikkje betala for å sleppa å få stein i hovudet. Me skal ikkje betala bompengar for å ferdast trygt langs vegane våre. Finansiering med bompengar på desse områda er grovt urettferdig, heiter det i resolusjonen.

Nygård trekte fram Tokagjelet som døme. Her legg fylkeskommunen opp til delvis bompengefinansiering av eit rassikringsprosjekt som er kostnadsrekna til om lag 2,2 milliardar kroner. I tillegg styrer fylkeskommunen mot bompengar i fleire andre vegprosjekt dei neste åra.

— Dette er ikkje ei bøn om gul stripe, midtdelar eller to felt på sykkelvegen. Det er ei bøn om at me alle skal ha ein trygg kvardag, få borna våre heim att i live, kunna reisa på arbeid utan frykt for rashendingar på vegen me ferdast på — kort og greitt ha eit trygt nærmiljø, sa Nygård til utsendingane.

Han meiner tida er inne for eit oppgjer med bompengane, og tok til orde for auka statlege rammer for rassikring.

— Trygge og sikre vegar kan ikkje vera avhengige av betalingsevna i lokalsamfunna. Dette er ei statleg oppgåve, sa Nygård.

Partiet minner i resolusjonen om koronakrisa og viser til at prosjekt kan framskundast og sikra sysselsetjing, men meiner bompengefinansiering ikkje er den rette løysinga.