Takka trufaste turgåarar
Den 11. mars for 20 år sidan vart dei fyrste skritta tekne i Fotalaget. Ein av initiativtakarane har delteke på kvar einaste tur sidan.
Initiativtakar Halldis Vangdal var difor heidersgjest då Grannehjelpa inviterte til jubileumsmiddag på Thon Hotel Sandven laurdag.
– Tusen takk for innsatsen du har gjort for Fotalaget, for lokalsamfunnet og for kvar og ein av dei som sit her. Du utgjer ein forskjell, sa vikarierande dagleg leiar i Grannehjelpa, Trude Soma Augestad.
– Mykje koseleg
Det var saman med Sidsel Mølster Storås at Vangdal melde seg til teneste på kontoret til Grannehjelpa for vel tjue år sidan. Der vart dei spurde om kva dei var gode til. Dei var gode til å gå på tur, sa dei. Då var det gjort.
Vangdal tykte det var stas å feira jubileum. Ho fortalde dei i salen om den fyrste turen som vart arrangert. Han gjekk til Berge og Stekka i regnvêr, og 29 personar møtte opp. No ser ho fram til fleire turar og ynskjer også nye turgåarar velkomne.
På frivilligfesten til Grannehjelpa 26. januar fortalde Vangdal litt om engasjementet då tilbodet vart presentert for festlyden. Ho konstaterte at ho har god tid og ikkje kan sitja heime og sjå på Movatnet kvar dag.
– Mange kjekke folk og mange fine, nye turar har me opplevd. Mykje koseleg! Og så er det ei glede å gå på tur i lag med andre, sa ho.
Ho opplyste at det var både menn og kvinne med i starten. Etter kvart vart det så få menn at dei kjeda seg litt. I april 2016 vart difor ei eiga turgruppe for menn, Karatrakk, etablert. Hausten 2018 kom gruppa Trakkatrimmen, som held noko rolegare tempo enn dei to andre.
Frå Grove til Madrid
I samband med jubileet hadde Helena Rykkje, koordinator i Grannehjelpa, funne fram litt artige fakta om Fotalaget. Med utgangspunkt i Sidsel Haugen sine utrekningar frå tiårsjubileet kunne ho fortelja at dei som har vore med sidan starten, til saman har gått kring 3.200 kilometer. Lengda samanlikna ho med å gå frå Norheimsund til Madrid.
– Eg må seia at eg er glad for at de held dykk her i Kvam med oss, sa Rykkje.
Årleg vert det ifylgje henne gått i gjennomsnitt 40 turar, som igjen vil seia at Fotalaget no er oppe i rundt 800 turar til saman.
– Det de driv med, er eit fantastisk fritidstilbod for alle og noko som har styrkt den frivillige innsatsen i vår kommune i 20 år. Det er eit enormt bidrag til folkehelsa i Kvam, sa Rykkje.
– Me håpar å halda liv i Fotalaget i minst 20 år til, sa Augestad.
