– Ta imot 50 flyktningar!

Det meiner rådmannen i Ullensvang. Han vil busetja «berre» 50 ordinære flyktningar, i tillegg til å opna for at tilreisande kan busetja seg på eiga hand.

Integrerings- og mangfaldsdirektoratet sine førebelse prognosar tilseier at kommunen kan verta oppmoda om å busetja kring 140. Eit slikt omfang meiner rådmannen av fleire grunnar vil vera uforsvarleg.

230 i år

Flyktningane skal busetjast i heile kommunen, ifylgje framlegget formannskapet drøftar 1. desember. Rådmannen ber her om fullmakt til å kjøpa einebustader med pengar frå flyktningfondet for å sikra familiebustader til dei nye innbyggjarane.

I år er det busett 230 flyktningar, etter ordførar Roald Aga Haug (Ap) via sms sa ja til å ta imot «kvite bussar» med flyktningar i vår. Tilstrøyminga vil truleg føra til den fyrste veksten i folketalet sidan 2016. I 3. kvartal auka folketalet med 128. Utan busetjinga ville folketalet ha gått ned også i år.

Kommunestyret vedtok tidlegare i år å opna for 200 flyktningar, pluss «sjølvbusetjing».

– Ullensvang har vore ein av dei kommunane som har busett flest samanlikna med innbyggjartal når me samanliknar oss med andre kommunar, skriv rådmannen.

Spreidde rundt

Bortsett frå i Røldal er det busett flyktningar i heile kommunen, men dei fleste finst på austsida av Sørfjorden og på Utne.

– Å auke busetjingstalet til 200 har vore utfordrande for tenestene som jobbar tett på flyktningane. Fleire av dei råka tenestene melder om stor slitasje og signaliserer kraftig at eit slikt høgt tal ikkje er berekraftig på sikt, utan større endringar i personale, organisasjonen og bygningsmassen. Arbeidet med integrering går over lang tid, og det vil krevja ressursar å integrera dei som har kome i 2022 på ein god måte, skriv rådmannen.

Han har bede tenestene om å melda frå om korleis det har gått i 2022. Jamt over er meldinga at dei har strekt seg langt og opplever slitasje. Fleire peikar på dårleg koordinering av tenestene.