Syskenpar opna avdeling i Steinsdalen

1. oktober flytta transportskulen inn i lokala på eigedomen der byggfagelevar ein gong fekk opplæring ved Norheimsund vidaregåande skule. Laurdag innvigde skulen avdelinga med både kurs og kake.

Syskenparet Vegard Sjursen (32) og Eirin Sjursen Lokøy (34) gjekk saman og kjøpte Tuft Transportskole i april. Dei stifta eit nytt aksjeselskap der kvar eig halvparten av aksjane. Då den tidlegare eigaren av skulen, Dan-Egil Tuft, skulle pensjonera seg, fekk Vegard, som har vore tilsett hjå og fått mykje tillit av Tuft, kjøpa skulen. For å få det til, vart han nøydd til å inngå eit samarbeid. Han fekk med seg Eirin og ektemannen hennar, Ken Thorvald Lokøy.

Vegard er dagleg leiar, Eirin kontormedarbeidar og Ken Thorvald utstyrsansvarleg. Saman driv dei skuleavdelingane i Åsane og Steinsdalen.

Slepp med kortare tur

Vegard er busett i Norheimsund, medan Eirin og ektemannen held til i Åsane. For Vegard var det naturleg å opna ei ny avdeling i Steinsdalen. Han får kort reiseveg til jobb og kan halda kursa sjølv. Ei ny avdeling vil òg nå ut til fleire, påpeikar han.

Han fortel at det allereie er mange som er busette i Hardanger som tek kursa i Åsane. For fleire av dei vert det ofte langt og tungvint å reisa dit. Den daglege leiaren håpar at den nye avdelinga kan medverka til større deltaking.

– Planen er at dei som er knytte til Hardanger-området, kan delta her, fortel Vegard.

Laurdag var det seks deltakarar i lokalet då eit teorikurs vart avvikla. Øyvind Berge var blant dei som deltok.

– Eg trur ikkje eg hadde teke kurset om det ikkje var i bygda. Det er enklare å gjennomføra no, fortel drosjesjåføren.

Travel kvardag

Ordet «hektisk» sa syskenparet i kor då dei fekk spørsmål om korleis starten som eigarar har vore. Dei er letta over at dei tok over eit etablert firma med godt rykte. Etterspurnaden i avdelinga i Åsane er stor, fortel Vegard.

For Eirin har det vore mykje nytt å setja seg inn i. Ho har tidlegare jobba som butikksjef og har utdanning i økonomi og administrasjon, i tillegg til varehandelleiing. No lyt ho læra seg ein ny bransje, fortel ho.

Vegard fortel at det er særs travelt på avdelinga i Åsane på vekedagane. Difor vart kurset i Steinsdalen skipa til i ei helg. Planen er å utvida tilboda i Steinsdalen på nyåret. Då vert det tilsett fleire. Då vil firmaet totalt ha 12 tilsette. I tillegg leiger verksemda inn vikarar når det er naudsynt, fortel den daglege leiaren.

«Tung» satsing

Syskenparet har investert i ny lastebil og buss. I tillegg er vedlikehaldsutgiftene på dei tunge køyretøya høge. Ettersom etterspurnaden blant elevar har vore stor, har satsinga vore verd investeringane, påpeikar dei to.

Vegard fortel at det har vore ein oppsving i marknaden for førarkort på tunge køyretøy. Når andre bransjar har hatt nedgangsperiodar, har Tuft Transportskole opplevd auke i etterspurnad, påpeikar han.

– Ofte er det slik at når andre bransjar slit, får vår bransje meir etterspurnad. Folk tek kurs hjå oss for å få jobb, anten det er å køyra buss eller lastebil. Det er ganske unikt, seier han.

– Stor takhøgd

Det er ikkje fyrste gong syskena jobbar saman. Dei har tidlegare arbeidd i lag i daglegvarebutikk. Dei omtalar syskenrelasjonen som positiv i eit partnarskap.

– Det er stor takhøgd for kjefting og smelling, fortel Vegard med glimt i augo.

Syskena er einige om at det hadde vore vanskelegare å ha same toleransegrense med andre, særleg om det gjeld nokon ein ikkje har ein relasjon til. Difor set dei pris på at firmaet vert drive som familiebedrift.

– Det er verdiar me likar, fortel Vegard.