Syr saman nytt tilbod

Om nokre veker startar eit tilbod for ungdomar og unge vaksne. Dei får sjansen til å møtast kvar veke for å laga kostyme, rekvisittar og kulissar til teaterframsyningane til kulturskulen.

Initiativet kom frå kulturskulen, men det er Jondal frivilligsentral som har skaffa pengar til tiltaket. Kulturtanken, ein statleg fagetat for kultur til born og unge, har løyvt 100.000 kroner til tiltaket.

Dette fortalde dagleg leiar Liv Bente Steiro i frivilligsentralen då ho tysdag 30. august fekk vitjing av utval for kultur og levekår i Ullensvang kommune. Ifylgje henne er den kreative verkstaden særleg retta mot unge som fell utanfor skule- eller arbeidslivet.

Drop-in-kontor

Kulturskulen er på langt nær åleine om å venda seg til Steiro. Rett som det er tek nokon kontakt med henne for å drøfta idear eller få hjelp til å realisera noko. Det hende til dømes då nokre av pensjonistane som går faste onsdagsturar i regi av frivilligsentralen, ynskte å setja i gang med restaurering av ein gamal flor på Tveddal. Prosjektet nærmar seg no slutten og skal feirast i haust.

– Dette hadde kanskje vore litt vanskeleg for dei på eiga hand. Me gjer det litt enklare, sa Steiro, som var med på å skaffa prosjektet stønad frå Sparebankstiftinga Hardanger.

Steiro har kontor vegg i vegg med Sentralen Gjenbruk og Møtestad, som opna for to år sidan. Det statlege tilskotet til satsinga stoppa ved nyttår, men møteplassen med låg terskel står no på eigne bein.

– Sentralen genererer mykje god aktivitet og har bidrege veldig positivt. Me har 10–15 frivillige damer, dei fleste unge pensjonistar, som driv han, medan eg har overordna ansvar for økonomi. Eg er rett og slett stolt av han, sa Steiro til politikarane.

Samlast til mat

Stolt er ho dessutan over seniormiddagane, som har samla mellom 60 og 80 eldre til samvær, mat og musikk fleire gonger. Besøket er meir enn dobbelt så stort som Steiro rekna med då ho søkte og fekk statleg tilskot.

– No får eg meldingar om når neste middag er. Det er veldig fint, sa Steiro.

Neste middag vert arrangert, i samarbeid med Jondal Skyttarlag, i skyttarhuset i Gjeskadalen 15. september. Verten får ein del av inntektene.

Steiro vonar å kunna halda fram med middagane når statstilskotet tek slutt. Når det fyrst er etablert og attraktivt, er gjestene truleg villige til å betala litt meir, trur ho. Ho ser dessutan føre seg at tilbodet kunne ha vore utvida til heile Ullensvang.

Frivilligsentralen organiserer i tillegg velferdstilbod på Vikevollen: lesestunder, song, musikk og kiosktralle. Her trengst fleire frivillige, opplyste Steiro.

Frivilligsentralen er privat og har eit eige styre. Årsbudsjettet er på kring 0,7 millionar kroner. Steiro har full stilling, mot tidlegare 60 prosent. Sentralen er ein av ni i frivilligsentralnettverket i Hardanger og Voss, og samarbeider elles litt med sentralane både i Kinsarvik og Odda i tillegg til lag og organisasjonar.