Syr hardangerbunader og bunadssko
Marte Linga – Sko og Saum AS i Norheimsund har søkt om 300.000 kroner frå det kommunale kraftfondet.
Pengane skal gå til maskiner, verktøy, arbeidsmøblar og materialar til saum av hardangerbunader og tilhøyrande sko. Eigenkapital og lån skal dekkja dei resterande 122.000 kronene av budsjettet på 422.000 kroner. Linga vil òg reparera og utvikla drakter og driva med undervising innan fagområda.
Linga er utdanna skomakar med fagbrev, er ålmennlærar og har ei mastergrad i tradisjonskunst. Mastergradsavhandlinga bar tittelen «Krotasko i Hardanger». Krotasko, som tradisjonelt er bruka saman med bunader ved staselege høve, vert laga av tjukt, heimegarva lêr. I lêret vert det prega geometriske mønster.
Linga går i lære hjå Orlaug Måge (80) i Orlaugs Bunadservice på Omastrand for å læra skreddarfaget. Planen er å fusjonera føretaka til Linga og Måge når sistnemnde ynskjer å gje seg.
Føremålet til selskapet til Linga er å vera ein kultur- og næringsaktør som vidarefører kunnskap om produksjon av drakter og bunader. Det er eit langsiktig mål å forvalta og vidareføra handlingsboren kunnskap om korleis ein formar og lagar sko og klede for hand, ifylgje søknaden.
Linga vil driva med tekstilsaum tre dagar i veka og skosaum i to dagar. Ho har knytt til seg gullsmedar og ei rekkje fagfolk som lagar ulike delar av hardangerbunadene.
