Syklist døydde etter ulukke
Mannen som fall då han sykla i Tokagjelet 31. august, er død.
Det melde Vest politidistrikt i ei pressemelding tysdag. Mannen som omkom, er Per Helge Jondahl (57).
Laurdag 31. august fall syklisten på fylkesveg 49 i Tokagjelet. Han var på veg nedover då uhellet var ute. Ifylgje politioverbetjent Per Gunnar Thrane ved Kvam politistasjon hende ulukka i svingane før den øvste tunnelen i Tokagjelet. Syklisten vart frakta til sjukehuset i luftambulanse.
Politistasjonssjef Terje Sperrevik fortel at politiet var på staden og gjorde undersøkingar.
– Me jobbar med å danna eit bilete av det som hende. Det er for tidleg å seia noko om årsaka til ulukka, seier han.
Bergens Tidende skriv at mannen døydde av hovudskadar. Politiadvokat Rune Malt i Vest politidistrikt opplyser til HF at ingen var vitne til sjølve ulukka. Mannen og sykkelen vart funne i vegen. Han seier at dei fyrste som kom til staden, og familien til syklisten, er avhøyrde. Det er ikkje kome fram informasjon om at fleire var innblanda i ulukka.
– Det har gått føre seg asfalteringsarbeid i området. Kan det ha ein samanheng med ulukka?
– Me kan ikkje utelukka det. Me har sett at det har gått ein kabelsliss der som har vore delvis fylt med grus, og som kan ha medverka, men me kan heller ikkje vita det sikkert, seier Malt.
Vest politidistrikt opplyser at Jondahl døydde av skadane 6. september. Familien er orientert om at namnet hans vert offentleggjort.
