Svingar seg opp via vikariat
For eitt år sidan vart Lidvard Sandven Hardanger-korrespondent i NRK takka vere ein morspermisjon. No har han skaffa seg programleiarjobb med same metode.
– Eg såg mitt snitt til å snappa dette nye vikariatet òg. For meg har morspermisjon vore ei gunstig ordning, seier Sandven.
I fjor var det Tale Hauso som var i morspermisjon. No gjer Elise Farestveit sin morspermisjon at nye moglegheiter opnar seg for kvemmingen. Stillinga heiter radioprodusent, og Sandven vert medprogramleiar i morgon- og ettermiddagssendingane til NRK Hordaland.
– Eg vert ein i ein duo anten i sendinga frå seks til ni om morgonen eller frå to til fem om ettermiddagen, fortel han.
For å få jobben, måtte Sandven danka ut det NRK omtalar som 22 godt kvalifiserte søkjarar.
– Har radioerfaring
Sandven, med ei kort fortid i HF, har mellom anna ein bachelorgrad i samanliknande politikk frå Universitetet i Bergen, og har vore praktikant ved Nynorsk mediesenter i Førde.
Det førre NRK-vikariatet varte til august. Sidan har Sandven vore tilkallingsvikar i NRK, samstundes som han har byrja på ei mastergrad i undersøkjande journalistikk ved Universitetet i Bergen.
Radio er ikkje noko nytt for han.
– Eg jobba litt i Studentradioen i Bergen for mange herrens år sidan, og så har eg jobba litt som direktereporter i NRK. I tillegg har eg lese nyhende. I morgon- og ettermiddagssendingane får eg friare taumar og kan vera meir meg sjølv. Det trur eg vert bra, seier han.
Startar på tysdag
Den første arbeidsdagen kjem allereie tysdag 18. oktober.
– Korleis skal du førebu deg?
– Det vert ein gjennomgang med erfarne programleiarar og litt oppfrisking av korleis ein brukar det tekniske utstyret. Men det vert mest «learning by doing», som er det eg likar, seier han.
– Kva betyr eit slikt vikariat for karrieren?
– Eg har ingen langsiktig plan med det eg gjer. Kanskje kan dette vera eit springbrett, men det er ikkje difor eg takka ja til jobben. Eg gjer dette fordi eg tykkjer det er gjevande og morosamt. Så får me sjå kvar vegen går vidare, seier han.
