Svevnlaus samling bak skjermar

– Eg føler det er natt no, seier Sindre Mo tysdag føremiddag.

Dataskjermane lyser opp ansikta i den mørke hallen. Bortsett frå litt småprat er det stille og roleg. Borna er konsentrerte. Store i augo. Rundt maskinene har det fylt seg opp i løpet av det siste døgeret: polarbrød og skinkeost, colaboksar, klede, emballasje, nudlar, Red Bull og kanelbollar. For å nemna noko.

– Eg må heim og eta middag i dag, seier ein av deltakarane med eit sukk.

Nokre tevlar om å vinna konkurransar og spel. Andre tevlar om å halda seg vakne lengst mogleg.

Gamarar har teke turen frå alle delar av heradet. Det er attpåtil nokre bergensarar med, ifylgje styreleiar Daniel Olsen i Kvam E-Sport.

Deltakarane er i barneskulealder, men også ungdomstrinnet og den vidaregåande skulen er representerte.

Nettverkssamlinga byrja måndag klokka 14 og heldt på fram til klokka 14 onsdag.

Andvakent

To av deltakarane, Sindre Mo og Benjamin Blakiqi Øystese, hadde framleis ikkje sove då HF var innom tysdag føremiddag, kring 22 timar etter at startskotet gjekk. Sjetteklassingane hadde bestemt seg for å halda seg vakne lengst mogleg.

– Merkar de på spelinga at de ikkje har sove?

– Ja, konsentrasjonen fell litt bort, seier Øystese.

– Det er difor me går litt rundt omkring og ut i lyset. Me treng frisk luft og sånt. Det må me ha, seier Mo.

– Kva har de ete?

– Ikkje så mykje sunt, for å seia det slik, seier Øystese.

– Eg kjøpte nokre nudlar på butikken, seier Mo.

På den eine kortsida av hallen var ei dør opna for å sleppa inn litt dagslys. Det hjelpte på både hjå deltakarane og vaktene.

Dersom augeloka vart for tunge å halda oppe, hadde gutane ein sovepose klar. Den eine delen av hallen var sett av til sovesal, men var lite i bruk – i alle fall den fyrste natta.

– Eg trur det snart vil dabba litt av og at folk søv litt, seier styreleiar Olsen.

– Ein får nye liv, men ...

Gutane er med på LAN fordi dei tykkjer det er kjekt å spela. Mo hadde lyst til å vera med også sidan det var det fyrste «kvammalanet» i historia, fortel han.

Mo spelar mellom anna Fortnite, Minecraft og bilspelet Need for Speed. Eit ratt er plassert framom skjermen hans. Øystese spelar Fortnite, Fall Guys og Roblox.

Spela Fortnite og Minecraft er gjengangarar, seier Olsen.

Då HF var innom, konkurrerte åtte av deltakarane saman i det sistnemnde.

– Kva går konkurransen ut på?

– Å drepa kvarandre. Ein får nye liv, men om senga di vert øydelagd, får du ikkje nye liv att, seier Sondre Åsebø, styremedlem i Kvam E-Sport.

– Ein startar på kvar si øy med ei seng, og den senga må du beskytta og byggja opp rundt, skyt Olsen inn.

Dei fleste hadde med seg eige utstyr. Om noko mangla, kunne det lånast av e-sportsklubben.