Svak nedgang for HF
Ferske opplagstal viser at HF har hatt ein liten nedgang det siste året.
Onsdag la Landslaget for lokalaviser (LLA) og Mediebedriftenes Landsforening (MBL) fram nye opplagstal for avisbransjen. Tala, som samanliknar opplagstala for fyrste halvår i 2023 med fyrste halvår i 2022, viser at HF har mista 11 tingarar.
HF hadde eit opplag på 4.816 det fyrste halvåret i år, samanlikna med 4.827 på same tid i fjor. Komplettopplaget – papir i tillegg til digitalt abonnement – har gått ned med 211. Det digitale opplaget, derimot, har auka med 187.
Ifylgje pressemeldinga frå LLA har kring 60 prosent av medlemsavisene gått tilbake. Os og Fusaposten vert nemnd som ei av fem aviser som har auka i opplag, med ein auke på 386.
Tala viser at totalopplaget for dei 110 medlemsavisene samla har gått ned med 3.258 opplag, som svarar til 0,9 prosent – eller «stabile opplagstal», som LLA kallar det.
