Svak krone er godt for turistnæringa

Turistnæringa i Noreg jublar for at den norske krona blir mindre verd.

Dei som ferierer i Noreg denne sesongen vil få meir for pengane enn vanleg, uansett om ein kjem frå utlandet eller er nordmann.

Den svake norske krona gjer nemleg at utlendingar får meir for pengane sine her i Noreg, medan nordmenn får langt mindre i til dømes Europa eller USA.

Det gjer at turistnæringa har grunn til å vere optimistiske, skriv NRK.

Om ein turist frå eit land som brukar amerikanske dollar eller euro betalar for opphaldet sitt no, vil det i realiteten vere billigare enn om nokre månadar om kronekursen stig att.

Kristin Krohn Devold, administrerande direktør i NHO Reiseliv, den største interesseorganisasjonen for bedrifter som driv med reiseliv og turisme i Noreg, ber likevel om at ein ikkje tek heilt av med sjampanje og kake før sesongen er skikkeleg i gang.

Ho seier at ein frå tidlegare periodar med svak krone veit at det kan føre til at talet på ferierande i Noreg aukar, men at ein ikkje må gløyme dyrtida vi er inne i.

– Vi veit at resesjon og stramme tider for folk flest, både i Noreg og Europa, kan gjere at fleire må spare. Det ser vi allereie i ferske og aukande konkurstal for reiseliv og varehandel, skriv ho i ein e-post til NRK.

Ho meiner også at det er ein trend dei siste åra at både norske og utanlandske gjester har sete på gjerdet lenger før dei bestiller ferien sin, og at dette aukar uvissa for bedriftene.

(©NPK)