– Svært omfattande kuttforslag
I staden for viktige og naudsynte nye prosjekt inneheld budsjettforslaget kutt i viktige kollektivsamband som vil råka regionen på ein uakseptabel måte.
Det skriv Hardangerrådet i ein uttale til Vestland fylkeskommune torsdag. I uttalen tek rådet opp kuttforslaga som rådet meiner rammar regionen mest: nedlegginga av ferjesambandet Utne-Kinsarvik og turistbåtruta på Hardangerfjorden.
Turistbåtruta knyter saman Hardanger og gjer det mogleg for innbyggjarar og tilreisande å nå «alle» delar av regionen på ein effektiv og turistvenleg måte. Det einaste sparetiltaket som synest fornuftig, er å redusera driftsperioden med éin månad i kvar ende, skriv rådet. Då vil båten eventuelt gå frå 1. mai til 30. september.
Hardangerrådet ber fylkeskommunen om å halda fram med stønaden til turistbåtruta i samsvar med gjeldande avtalar til og med sesongen 2026. Det vil gje òg reiselivet føreseielege vilkår for sal og marknadsføring av reiselivsprodukt, meiner rådet.
Når det gjeld ferjesambandet, presiserer regionrådet at sambandet er ein viktig livsnerve i Ullensvang kommune. Sambandet har dessutan ein viktig beredskapsfunksjon som omkøyringsalternativ når riksveg 13 mellom Kinsarvik og Odda er stengd.
Rådet meiner at Hardanger har blant dei dårlegaste vegane og det dårlegaste kollektivtilbodet i Vestland. Kollektivtilbodet bør difor styrkjast. Dessutan må arbeidet med tunnel mellom «pollane» og Tokagjelet halda fram, meiner Hardanger-kommunane.
