Sushien kjem til «hjørnet»
Det vert store endringar på menyen når nye leigetakarar flyttar inn i lokalet til Kafé Hjørnet.
Går det som Espen Nordset Raknes ønskjer, vil ein ny restaurant servera dei første sushiane i lokala 1. desember. Det føreset at ein vert ferdig med alt naudsynt arbeid, og at svaret på søknaden om kommunalt serverings- og skjenkjeløyve vert positivt.
Raknes, som er dagleg leiar i Barmen AS, fortel at den nye serveringsstaden har fått namnet Uni Izakaya. Det er japansk og betyr «Kråkebollen gastropub».
Lokale råvarer
Sushi kjem til å dominera menyen.
– Me kjem ikkje til å ha ein veldig omfattande meny, men i staden ha høg kvalitet på dei rettane me tilbyr, seier Raknes.
Restauranten vil ha nokre alternativ for dei som ikkje ønskjer sushi. Mellom anna skal dei tilby ramen og donburi. Den første retten er ei nudelsuppe, den andre ei skål med ris dandert med kjøt og grønsaker. Begge rettane er japanske.
– I japansk matfilosofi er ein oppteken av å bruka lokale råvarer. Det japanske konseptet betyr at me vert veldig lokale, seier Raknes.
Stjernekokk frå Madeira
Raknes skal laga ein del av maten, men har også hyrt inn den portugisiske sushikokken Pedro Pequito Ribeiro som kjøkensjef.
– Han har stor fagleg tyngd og har dei siste åra jobba på ein sushirestaurant på eit femstjerners hotell på Madeira, fortel Raknes.
Ribeiro skal flytta til Kvam saman med ektemannen Vitor Alvez, som kjem frå Brasil. Alvez skal jobba som bartender på gastropuben.
– Dei flyttar til Kvam fordi dei tykkjer dette er ei spanande utfordring, og fordi dei ønskjer å vera med på å byggja opp noko nytt, seier Raknes.
Ribeira og Alvez har så langt berre sett videoopptak frå lokala. Torsdag kveld kom dei til Kvam.
– Har trua
Raknes fryktar ikkje at talet på kvemmingar som likar sushi, er for lågt.
– Eg høyrer om mange som reiser til Bergen berre for å eta god sushi. Slår me saman kvemmingane og hytteturistane, trur eg det er nok som likar sushi til at dette kjem til å gå bra, seier han.
Gjestene kan velja om dei vil eta i lokala eller ta maten med seg. Restauranten skal tilby catering.
Raknes reknar med restauranten vil ha ope frå onsdag til sundag den første tida. Han er usikker på kor mange tilsette det vert.
– Dess større etterspurnad, dess fleire tilsette, seier han.
– Trist og letta
Kafé Hjørnet la inn årane i slutten av september. Dagleg leiar Solveig Helen Gjøen Mo fortel at kafédrifta har vore ein lang og bratt motbakke. Kafé Hjørnet opna dørene ei veke før koronaviruset «stengde» landet. Kafeen vart også stengd i fleire månader etter at brannen i Mathildes Pizzeria & Kjøkken førte til store vasskadar i fjor sommar.
– Til slutt skjøna eg at slaget var tapt. Me kom oss aldri på føtene att etter brannen. Sidan har råvareprisane, rentene og straumprisen auka. Eg har vore sta og stått på meir enn eg trur dei fleste andre ville ha gjort. Det var dette eg hadde lyst til å driva med. Det er vemodig å slutta, men samstundes er eg letta, fortel ho.
Mo har fått nok av kafédrift for ei stund.
– Framover skal eg jobba som frittståande hudpleiekonsulent for Mary Kay, seier ho.
