Strekkjer ut ei hand til dei som treng henne mest

Også dette året stilte lokale Lions-medlemer opp i gamleskulen på Norheim i Norheimsund og pakka kassar med mellom anna ost, fisk, klementinar og sjokolade. Kassane skal gå til dei som treng dei mest. Og dei er det ein del av i dyrtida.

– Behovet er stort og aukar diverre år for år, seier Gunnar Eiken i Lions Club Norheimsund.

– Kunne vore fleire

Då klubben byrja med matkassane for ein god del år sidan, vart 20–30 pakka. Sidan har omfanget svinga litt, men over tid auka jamt og trutt. I år stig talet til 60. Også kostnaden med kvar kasse har auka. Etter den kraftige prisveksten i år har verdien stige til kring 700 kroner.

Kassane vert distribuerte av barnevernet, flyktningtenesta og avdeling for rus og psykisk helse i Kvam herad, som veit mykje om kvar skoen trykkjer mest. Avsendarane veit ingenting om kven som får matkassane, men får eit varsel om behovet.

– Det kunne vore fleire kassar, konstaterer Eiken.

Sjølv om Rema 1000 ifylgje han gjev gode prisar på varene i kassane, og næringslivet i tillegg sponsar tiltaket til nær 45.000 kroner, må Lions-klubbane henta av eigen kasse for å finansiera hjelpa.

Fleire er med

Lions – med «We serve» som slagord – har som mål å gjera noko godt både for lokalmiljøet, nasjonalt og internasjonalt. Matkassane er ein liten bit av innsatsen for å nå målet, fortel Eiken.

Nytt av året var at også Lions Club Strandebarm var med på tiltaket og dugnaden. Såleis var fleire hender – i alt tjue – i sving i gamleskulen. Pakkinga, organisert etter samlebandprinsippet, tok om lag to og ein halv time medrekna ei sosial økt med kaffi. Snittet per kasse var med andre ord på nokre få minutt.

– Det gjekk utruleg greitt og effektivt, seier Turid Bang i Lions Club Norheimsund, som skryter av særleg Gunnar Eiken og Håkon Ystheim for god organisering av dugnaden.