Støtta bøndene etter litt om og men

Det vart ein lang og kronglete debatt på tampen av kommunestyremøtet onsdag då Kollbotn la fram eit framlegg til fråsegn som støttar kampen til bøndene for betre vilkår i jordbruksoppgjeret. Ikkje minst frå Gard Folkvord (Ap) og representantar for regjeringspartia fekk han kritikk for å senda framlegget seint ut — kvelden før — og for å ha gjort unøyaktig hastverksarbeid.

Særleg den fyrste setninga i framlegget fekk gjennomgå. Kollbotn føreslo ei fråsegn der ein slår fast at Ullensvang har «eit sterkt fagmiljø, samvirkedrivne fruktlag og ivrige drivarar, trass i regjeringa sin landbrukspolitikk». Terje Bleie (H), til dømes, hevda at framlegget inneheldt informasjon som var direkte feil og i strid med det som står i tilbodet frå regjeringa.

Både å overlata oppgåva med å formulera fråsegna til gruppeleiarane, og å utsetja saka til neste kommunestyremøte, vart drøfta. Konklusjonen til ordførar Roald Aga Haug (Ap) var at gruppeleiarane ikkje er eit politisk organ som kan vedta fråsegner på vegner av kommunen, og at saka er aktuell her og no og ikkje i juni.

Enden på visa var at ei avkorta fråsegn utan regjeringskritikk vart samrøystes vedteken. Denne lyder slik:

«For å ta vare på distrikta og busetnad i heile landet, må norsk landbrukspolitikk sikre at denne næringa kan utvikle seg. Ikkje minst gjeld dette små og mellomstore bruk her i Ullensvang og på resten av vestlandet.

Difor oppmodar Ullensvang kommunestyre landbruksministeren og regjeringa om å kome bondeorganisasjonane sin krav i møte ved året landbruksoppgjer. Om ikkje dette skjer, ber Ullensvang kommunestyre om at Stortinget fylgjer dette opp.«

Fråsegna skal sendast til statsministeren, landbruksministeren, dei parlamentariske leiarane på Stortinget, bondeorganisasjonane og pressa.