Stort sett nøgd med kraftverk
Noregs vassdrags- og energidirektorat inspiserte Stampaelva kraftverk 5. oktober.
Føremålet med inspeksjonen var å kontrollera at anlegget er bygt i samsvar med godkjend detaljplan for miljø og landskap. Anlegget vart sett i drift i desember 2021, og endeleg frist for ferdigstilling er desember 2023.
Arealbruken ved inntaket er godt avgrensa, og det er ikkje teke i bruk meir areal enn naudsynt, skriv direktoratet. Ved inntaket er det ei provisorisk gangbru over elva. NVE er orientert om at ho skal erstattast av ei permanent gangbru.
Arealbruken knytt til den delen av vassvegen som er graven ned, er godt avgrensa og sett i stand med godt resultat. Inntaket er bygd veglaust. Det er bygd ny permanent veg fram til kraftstasjonen. Løysinga for etablering av riggområdet ved inntaket har gjeve lite fotavtrykk i terrenget, ifylgje NVE.
Arbeidet med å setja i stand riggområdet ved kraftstasjonsområdet er gjennomført med godt sluttresultat. Det er lagt til rette for naturleg tilvekst ved å tilføra vekstvillige massar som toppdekke, heiter det i rapporten.
Etter NVE si vurdering kan den omtala kabelen skjulast betre i dei partia han ligg på terrenget, og på enkelte strekk kan han gravast ned.
