– Stort potensial

Det hevdar Norce Norwegian Research Centre AS i eit forprosjekt utført i samarbeid med dei to herada. No er Hardangerrådet invitert til å føre prosjektet vidare. Norce vil leia arbeidet også for hovudprosjektet.

Prosjektet heiter «Arbeidsstad: Der du vil! Auka bruk av fjernarbeid og moglegheiter for Hardanger-/Voss-regionen» og var i 2021/2022 finansiert av regionalt forskingsfond i Vestland.

I innkallinga til rådsmøtet torsdag 30. mars heiter det at digitalisering og fleire heimekontor er ein sjanse for kommunane i Hardanger og Voss til å tiltrekkja seg arbeidstakarar som er sysselsette i verksemder utanfor regionen, ved å leggja betre til rette for fjernarbeid.

Dagleg leiar i rådet, Jostein Eitrheim, tilrår å verta med på prosjektet og søkja Sparebankstiftinga Hardanger om 500.000 kroner til det. Det er den eine halvparten av den totale kostnaden for prosjektet. Søknaden føreset at kommunane i Hardangerrådet, saman med Voss herad, vil dekkja den andre halvparten. Løyvingane frå kvar kommune må stadfestast gjennom vedtak. Kommunane bidreg i tillegg med ein eigeninnsats på 50 timar kvar prosjektperioden, føreslår administrasjonen i rådet.

Kvar kommune skal peika ut ein person på høgt administrativt nivå med ansvar for å følgja opp behov knytte til forskingsprosessen. Desse personane skal utgjera prosjektet si referansegruppe, ifylgje framlegget.

Mange av dei meir desentrale kommunane har både lågare bustadprisar og ein nærleik til naturen som bykommunane ikkje kan tilby, ein kombinasjon som vil vera attraktiv for mange arbeidstakarar, meiner Eitrheim.

Prosjektet omfattar éin del der ein skal samla kunnskap, og éin del der ein skal bruka kunnskapen til å utvikla konkrete tiltak som skal auka sannsynet for at fleire vil velja å flytta til Hardanger og Voss, men fjern-arbeida for arbeidsgjevarar utanfor regionen.

Resultata frå forprosjektet syner at er råd å leggja til retta for fjernarbeid i ei rekkje produkt- og tenestekategoriar. Moglege tiltaksområde inkluderer mellom anna etablering av arenaer for samarbeid og kunnskapsdeling, meir målretta oppfylging og rådgjeving av skuleelevar og studentar, og regionalt samarbeid for ein felles bu- og arbeidsmarknad.

Det er eit mål for prosjektet å avdekkja mellom anna korleis verksemder arbeider med tilrettelegging for fjernarbeid og kva tenesteområde som er mest relevant å fokusera på.

Prosjektet skal munna ut i fleire leveransar. Det viktigaste er ein rapport som oppsummerer kunnskapsgrunnlaget frå studien, verkemiddel og ein ambisjon om å etablera konkrete avtalar mellom ei gruppe av arbeidsgjevarar og kommunane i Hardanger.

Det vert lagt opp til del to av prosjektet i 2024. Då vil det vera retta mot arbeidstakarsida.