Storstreiken er over: – Historisk godt resultat

Storstreiken vart for stor til å vare og er over etter semje mellom LO og NHO. Men YS streikar vidare og har ikkje klart å semjast med NHO om ein avtale.

– Vi har 33.000 medlemsbedrifter som har ønskt at vi skulle forhandle. Ikkje ein time har vi ønskt streiken. Streiken har vore unødvendig, seier NHO-sjef Ole Erik Almlid.

I avtalen som LO og NHO har inngått, er det semje om ei ramme på 5,2 prosents lønnsvekst, men at ein større del av det blir gitt i sentrale tillegg.

– Eit historisk godt resultat, seier LO-leiar Peggy Hessen Følsvik. Ho legg til at også medlemmene hennar no er glade for at streiken er over.

Streikande LO-medlemmer kan dermed gå tilbake på jobb frå klokka 6 fredag morgon.

Ramma vart altså den same som den som låg på bordet då det vart brot i meklinga og landet vart kasta ut i ein storstreik. Men det sentrale tillegget blir 0,2 prosentpoeng høgare, medan det også blir gitt eit låglønnstillegg på 3 kroner.

– Vi har fått ein svært god låglønnsprofil på plass. Det var eit av dei aller viktigaste krava vi gjekk inn i forhandlingane med, seier Følsvik.

– Alvorleg konflikt

NHO-sjef Ole Erik Almlid seier at NHO allereie hadde strekt seg langt, men at det vart tydeleg at streiken ikkje kunne halde fram. Fleire bedrifter måtte permittere, og det var frykt for korleis dei økonomiske konsekvensane skulle bli.

– Når vi ser at det er mogleg å setje seg ned og lage ei løysing, var vi innstilte på det, begge partar, seier Almlid.

Almlid understrekar at det framleis er moglegheit for å tilpasse lokale avtalar slik at bedrifter som slit, ikkje skal få ei for stor rekning.

– Dette var ein konflikt som hadde eit alvor over seg. Det er veldig mange av bedriftene våre som no får ein kostnadsauke som er tung å bere, men som vi meiner det er mogleg å bere. Også fordi det er ein kostnad ved å streike, seier Almlid.

YS godtek dialog – men streikar vidare

YS-leiar Hans-Erik Skjæggerud seier YS aksepterer dialog med NHO, men at det er viktig å gi flest mogleg auka kjøpekraft, og at dette enno ikkje er på plass. Skjæggerud seier det er eit viktig krav å sikre dei lågtlønte tillegg.

– YS har medlemmer i grupper og bransjar som ligg godt under 90 prosent av gjennomsnittleg industriarbeidarlønn, seier han.

Leiar for YS Privat Anneli Nyberg seier det er viktig for YS å klare å snu ein trend der mange medlemmer har tapt kjøpekraft og vorte hengande etter.

– Vi vil halde fram den viktige jobben med å utlikne forskjellar og sikre likelønn, seier Nyberg.

– Reallønnsvekst for alle

Leiaren i Fellesforbundet, Jørn Eggum, sa på veg inn i lokala til Riksmeklaren at han er fornøgd med løysinga.

På spørsmål frå NTB om det no blir reallønnsvekst for alle, svarer Eggum slik:

– Ja, det blir det, men la oss gå inn og ta det formelle først.

Det er ikkje kjent kva som skjer med dei streikande YS-medlemmene.

Første i mellomoppgjer

Oppgjeret i år er eit såkalla mellomoppgjer, der det berre blir forhandla om lønn. Det er første gong i etterkrigstida det er streik i eit mellomoppgjer.

Sist gong LO gjekk til streik, var i 2000. Også den gongen streika arbeidarane for meir lønn – og til liks med dagens streik rasa mange over høge leiarlønningar.

22.947 LO-medlemmer og 1.441 YS-medlemmer har sidan måndag vore i streik etter at meklinga med NHO braut saman mange timar på overtid sist søndag. Allereie fredag var det varsla at 16.561 LO-medlemmer til skulla ut i streik. YS har varsla at fleire YS-medlemmer går ut i streik fredag.

Bakgrunnen for streiken er brot i meklinga om lønnsoppgjeret i det såkalla frontfaget, altså industrien. NHO, YS og LO vart ikkje samde om kor høgt lønnstillegget skulle vere i frontfaget, som igjen blir viktig for kor mykje meir lønn andre grupper i Noreg vil få i år.

Det er venta at prisane i Noreg vil stige med 4,9 prosent i år. Kravet har vore meir enn dette i lønnsvekst for å sikre at folk ikkje får mindre å rutte med.

(©NPK)