Storfest for skulen

Både bygdefolk, tilsette, elevar, entreprenørar og prominente gjester frå kommunen var inviterte då skulen baud inn til feiring og snorklipping fredag. Pølser, lappar og kaker vart serverte, dansar dansa, talar haldne og musikk framført. Dessutan fekk gjestene omvising av ivrige og lommekjende elevar.

HF spurde ein gjeng med 10.-klassingar og ein 8.-klassing om kva dei tykkjer om den «nye» skulen. Ein av dei siterte «Klypa» for å skildra skulen etter oppgraderinga.

– Han er «meget oppegåande», seier 10.-klassing Tobias Grønsberg-Træet.

– Han har fått mange nye funksjonar og vorte fin og kvit. Me har fått ein del nye rom. Det er jo litt greitt, for før heldt me på med naturfageksperiment i klasseromma. Det er fint å ha litt meir plass, seier Andreas Lundal Njåstad.

Gutane etterlyser asfalt og leikeapparat ute. Bortsett frå fotball er det ikkje så mykje å gjera på, fortel dei. Om vinteren endar det fort med slåsting i snøen, som gjerne endar med tilsnakk.

Dei fleste gutane får ikkje langvarig glede av den nye skulen, men det er for så vidt greitt.

– Me har sett nok. Ein vert passeleg lei av å gå på den same skulen med dei same folka, seier ein av dei.

– Korleis var det å vera på fest?

– Det var noko utanom det vanlege. Me slapp litt matematikk, så det var eigentleg meget oppegåande det òg, seier Grønsberg-Træet.

Også 10.-klassing Victoria Linjord-Solberg og 9.-klassing Emilie Samland vonar uteområdet vert oppgradert, men er elles stort sett nøgde med skulen. Dei har, for å nemna noko, fått fleire grupperom, eigne spesialrom, nye kulturskulelokale og stor, fleksibel gymsal.

– Me har fått meir funksjonelle rom og større og finare plass, seier Linjord-Solberg, som gjerne skulle hatt litt meir fargar i dei nye skulelokala.

Sjå intervju med jentene og glimt frå opninga her:

Lang historie

To tidlegare rektorar fekk oppdraget med å fortelja historia både til skulen og oppgraderinga. Det tok nemleg si tid før snakk vart til handling og spaden kunne setjast i jorda.

– Det er fantastisk å vera her i dag, sa Jofrid Kårstad Espeland, som var rektor fram til 2014.

Jondal skule stod ferdig i 1962, med seks klasserom, skulekjøken, sløydsal og gymsal. Dei minste borna gjekk den gongen på den gamle skulen. Seks år seinare kom den såkalla paviljongen, som sidan vart utvida, men no er riven. I 1979 kom musikkskulen i drift, og han fekk snøgt stigande elevtal. Fem år seinare vart han kommunal. Skulen vart gradvis utvida.

Ymse endringar og reformer i skuleverket førte på 1990-talet til tankar om ei heilskapleg oppgradering som skulle resultera i «draumeskulen». Det skulle likevel gå mange år før det vart alvor, sjølv om skulen vel å merka vart utvida i 2005. Diskusjonane heldt fram, og skisser av løysingar vart etter kvart presenterte for kommunen. Ei plannemnd vart danna for å kartleggja arealbehovet og laga eit romprogram for skulen og kulturskulen.

– Kanskje var det ikkje så rart at haldninga blant dei tilsette var «det trur me ikkje før me får sjå det», sa Værland.

Omsider i gang

OG Arkitekter og Vaardal-Lund vart sette i sving med å formgje skulen. I september 2017 vart eit framlegg presentert for kommunestyret, som vedtok å satsa på ein stor fleirbrukshall med mellom anna bibliotek, kantine og treningsrom i eitt og same bygg.

Eit billegare alternativ for opprusting vart etter kvart forkasta etter råd frå entreprenørane, og kostnaden skaut i vêret. iVest Consult AS prosjekterte, medan kvammaverksemda H2 Hardanger AS leia bygginga. Røynstrand Entreprenør AS bygde skulen. Consto Bergen AS reiste fleirbrukshallen.

Politikarane godkjende kostnadsauken, og ei utbygging med fire trinn vart sette i sving. Oppgradering av symjehallen kom fyrst og var ferdig i 2018. Opprusting av skulen, riving av paviljongen og bygging av fleirbrukshallen kom så i gang i 2019, før riving av gymsalen og biblioteket og bygging av nytt bygg for kulturskulen og rehabilitering av garderobar kompletterte prosjektet.

– Det er med stor glede me opplever det ferdige anlegget. Det meste ser ut til å fungera. Jondal har fått ein fantastisk fin skule, kulturskule, bibliotek og eit idrettsanlegg dei fleste vil vera imponerte over i ei lita bygd. Eg er stolt over og glad for at Ullensvang kommune har fullført prosjektet me planla og starta i Jondal kommune, sa Værland, som takka alle involverte for eit svært konstruktiv samarbeid til glede for jondølingane.

Elevane måtte få undervising i brakker og ha skulekvardag i eit kaotisk byggjeområde då prosjektet gjekk føre seg, og fekk ros og takk for tolmodet. Rektor Sarah Marie Røstbø har leia skulen i byggjetida, og vart særskilt framheva på festen.

– Snakk fram tilboda!

Før ordførar Roald Aga Haug (Ap) fekk æra av å klippa snora, fortalde han at han har masa lenge om å få opna skulen. Skulen er ein av dei flottaste og beste i heile Vestland, meiner han. Stundom løner det å ta seg tid for å gjera resultatet betre, sa han.

– Dette har Jondal fortent. Jondal har vore litt lur og flink og tilpassa seg framtida, sa Haug, som viste til at mange funksjonar er konsentrerte på ein sentral stad med nærleik til fleire andre tilbod.

Han meiner anlegget gjer både tilboda ved skulen og Jondal veldig attraktive. Han meiner Jondal er kommunens vakre andlet, og sa at kommunen er stolt over resultatet.

– Snakk fram tilboda her og kor godt og lett det vil vera å vera småbarnsforeldre i Jondal! sa han.

Verksemdleiar for prosjekt og utvikling i kommunen, Marit Ystanes, sa at det har vore eit spanande og utfordrande prosjekt med mange diskusjonar om løysingar, men ikkje konfliktar.

Her kan du sjå fleire bilete frå skulen og opninga: