Storeslem til hardingane
Prosjektet «Basecamp» ved Ungdomsbasen får 1,2 millionar kroner i fylkeskommunal stønad.
Det avgjorde fylkesutvalet 28. november. Berre fyrste fase av aktivitetsparken Smelteverket i regi av Ullensvang kommune fekk meir, nærare bestemt 2 millionar kroner.
Pengane kjem frå ei ordning for tilskot til berekraftig samfunnsutvikling. I alt vel 9,6 millionar kroner vart fordelte, og hardingane stakk altså av med om lag ein tredel av dei.
Føremålet med ordninga er å utvikla stader, utlikna helseskilnader og mobilisera til klimaomstilling og nullutslepp for å skapa trygge og tilgjengelege stader for folk trivst og er aktive.
Kvam herad fekk full utteljing for søknaden. Prosjektet går ut på å realisera ein uformell møteplass ved Ungdomshallen og Ungdomsbasen i Norheimsund, i samarbeid med ungdomane.
På den fylkeskommunale vurderingsskalaen i sakspapira er prosjektet tildelt 5,13 av 7 oppnåelege poeng, som tilseier at det er «svært godt». Søknaden treffer godt, særleg når det gjeld sosial utjamning, klima og stadutvikling, heiter det.
Heradsstyret sette før sommaren av nær 1,1 millionar kroner til prosjektet. I tillegg har Sparebankstiftinga løyvt 200.000 kroner. 50.000 er tildelte frå det kommunale kraftfondet, og 90.000 kroner kjem frå Bufdir via utekontakten. Resten av budsjettet på vel 2,8 millionar kroner er kommunal eigeninnsats.
Ifylgje leiar for samfunn, næring og kultur, Jon Nedkvitne i Kvam herad, skal saka drøftast i eit internt møte. Etter det vil ein vita meir om framdrifta.
Les også:
