Store mengder skog skal takast ut i Melstveitåsen
Melstveitåsen veglag har fått tilsegn om å få dekt 60 prosent av kostnadene med ein skogsveg i klasse 4.
Rådmannen i Kvam herad har gjeve tilsegna. Om lag 50.000 kubikkmeter skog skal takast ut i Melstveitåsen i åra som kjem.
Vegen på til saman 6.800 meter vil kosta om lag 10,5 millionar kroner. Vegprosjektet vert delt i 3 parsellar. Del 1 får tildelt 1,5 millionar kroner for 2022. Ei restløyving kjem i 2023. Løyving til dei 2 andre parsellane kjem fortløpande ut frå løyvd ramme.
Pengane skal delast ut over fleire år og med atterhald om tildelt ramme frå Statsforvaltaren.
Rådmannen ser på tiltaket som naudsynt for å kunna ta ut tømmeret på ein rasjonell måte. Vegkostnaden per meter er høg, men veganlegget vil utløysa mykje skog. Tilskotet vil koma på 210 kroner per kubikkmeter tømmer som vegen løyser ut. Kvam herad godtek vegkostnaden.
Løyvinga er gjeven på vilkår av at skog som vert hogd, vert tilfredsstillande foryngt etter reglane i skoglova, at andre skal kunna kjøpa seg inn i vegen eller betala leige for å nytta han og at vegen skal godkjennast av Kvam herad før han vert nytta. Skogsbilvegen skal haldast ved like i den standarden han vart bygd i.
