Stogga sak om eigedomskjøp eller -leige
Initiativet frå H til å vurdera å sikra seg Kvam vidaregåande skule vart stoppa på dørstokken.
Grunngjevinga til ordførar Torgeir Næss (Ap), som avviste den omfattande interpellasjonen, er at eit liknande framlegg vart teke opp så seint som i mai. Ifylgje det politiske reglementet kan ordføraren nemleg avvisa framlegg som gjeld ei sak som er «lovleg vedteken» i løpet av dei tre siste månadene. Det høvet valde Næss å nytta.
Næss viste i heradsstyremøtet 20. juni til at temaet Sandven tek opp, er å be rådmannen ha dialog med fylkeskommunen om kjøp eller leige av skuleeigedomen. I ein interpellasjon i mai vart dialog om kjøp teke opp i ein interpellasjon frå Bjarte Helland (INP). Helland fekk ikkje fleirtal for framlegget.
– Same igjen
Tolkinga til Næss er altså at interpellasjonen frå Sandven gjeld ei sak som nyleg vart avgjord.
– Eg kunne ha sleppt han gjennom, men meiner av prinsipp at oppattaking av same emne ikkje bør koma gjennom, sa Næss.
Sandven ynskte å vurdera kjøp eller leige for å sikra mellombelse skulelokale når Øystese skule skal oppgraderast. Den planlagde løysinga for undervising er å nytta både brakker ved Øystesehallen og 36-bygget på skuletomta.
Ordføraren påpeika at han vonar at rådmannen beit seg merke i det han meiner er solid argumentasjon frå Sandven. Næss reknar det som sjølvsagt at ho kontinuerleg vil vurdera om leige av «gymnaset» kan vera eit godt alternativ.
– Bør skamma oss
Sandven er ikkje samd i vurderinga til Næss, og viste til at interpellasjonen frå INP ikkje spesifiserte eit konkret føremål med kjøpet av eigedomen.
Han understreka dessutan at lærarar, foreldre og grendeutvalet i Øystese har sagt frå om at dei ynskjer eigedomen på Rossvoll vurdert som eit alternativ. Løysinga kan spara heradet for pengar, trur Sandven, som før møtet hadde sjekka kva brakkeløysingar har kosta andre stader.
– Ungane og lærarane har hatt eit skule- og arbeidsmiljø langt under det som er akseptabelt i mange år. Korkje me som politikarar eller administrasjonen bør vera stolte over framdrifta. Me bør kanskje til og med skamma oss litt, sa Sandven.
Han understreka at han fekk vita frå Næss dagen før møtet at det var råd frå administrasjonen som låg til grunn for avgjerda om å velja å avvisa interpellasjonen.
– Eg er diverre ikkje særleg overraska, sa Sandven.
Næss sa at dersom Sandven kjem med ein tilsvarande interpellasjon i septembermøtet, vil Næss godta han på saklista sidan det då vil ha gått meir enn tre månader sidan avgjerda i mai.
