Jan Rune Kristiansen og sonen Fridtjof tok turen frå Strømmen med ein Mercedes 220 S frå 1964, ein av 11 bilar i samlinga. Den eldste bilen som var med denne gongen, skal ha vore frå 1952. — Veldig fin tur, bortsett frå vêret. Men det fekk me beskjed om at det var me austlendingar som tok med oss, seier Kristiansen.

Stjerner på tur

Eit tjuetal tilårskomne Mercedes-Benz-bilar saug til seg lange blikk laurdag.

Sigbjørn Linga
Bladstyrar
Publisert Sist oppdatert

— Ein kan ikkje ha dårleg tid når ein er på tur med desse, seier Tom Christian Lie Vikør.

Han var ein av bileigarane som trassa skyer og regn og sola seg litt i glansen av eigen doning på ein tur fjorden rundt. Ruta gjekk frå Norheimsund til Tørvikbygd, Jondal, Utne, Nå og Kvanndal, før gjengen vende heim att. Undervegs får gjengen rikeleg med merksemd og spørsmål, forsikrar Vikør.

Tom Christian Lie Vikør køyrer om bord med sin Mercedes 280 SE 3,5 coupé frå 1971. — Eg måtte ha noko med tak denne gongen, seier han.

Bakgrunnen for den motoriserte utflukta var at Stjernevognen, ein riksdekkjande Mercedes-Benz-klubb, hadde sin årlege tur og valde Hardanger som reisemål. Gjestene, som kom dels langvegsfrå, overnatta på Thon Hotel Sandven og samla seg mellom anna i det «nye» stabburet til Vikør på Sandven.

Nokre av dei lokale Mercedes-Benz- og veteranbilentusiastane nytta høvet og heiv seg med på turen.

Terje-Egil Torvik på tur med ein 52-åring — ein 280 SE coupé. — Når ein fyrst er smitta av denne sjukdomen, får ein leva med det, seier Torvik, som har fleire bilar i samlinga.

Også Kvam Veteranvogn Klubb, der Vikør er ein av lemene, er rett som det er å sjå på tur. Klubben har samling kvar tysdag og plar ta ei lokal stripe. Om vêret ikkje er på dei bilinteresserte si side, samlast nokre av dei i basen i Belsen i Steinsdalen for å prata skit — eller kanskje bil.

Poenget? Sosialt samvær. Å visa fram dei rullande skattane. Og å halda bilane i jamleg drift.

— Sjølv køyrer eg fleire tusen kilometer i året med dei, fortel Vikør.

Arvid Ove Vikør i ein lyseblå 1965-modell. Reisefølgjet stoppa på Cinderella Tavern på Nå og i kakebua i Steinstø for å eta.
Dette er ein Mercedes 300 «Adenauer» 1953-modell. Namnet Adenauer kjem frå rikskansler Konrad Adenauer sin kjærleik for den svære luksussedanen. Bilane vert omtala som Mercedes sin «Rolls Royce».
Mercedes-kortesjen på Kaldestad.
nyhende bil fritid
Laga med Labrador CMS