Stille start på «skogen»
Palmehelga gjekk roleg og fint føre seg på Kvamskogen, opplyser hjelpekorps.
Strålande sol og skitilhøve venta dei som nytta helga, og gjerne starten på påskeferien, i fjellet. Ifylgje Ingeborg Steine Jensen, leiar i Norheimsund Røde Kors Hjelpekorps (NRKH), vart det ei relativt fredeleg helg for dei frivillige på «skogen».
Utanom eit henteoppdrag gjekk det stort sett i varekøyring, forklarar Jensen.
– Det er i alle fall eit teikn på at folk er på hytta, slår ho fast.
– Godt bemanna og budde
Frivillige frå NRKH, Bergen Røde Kors, Arna og Åsane Røde Kors og Samnanger Røde Kors er på plass på Kvamskogen for å bidra til at påskedagane vert tryggast mogleg for både store og små. Medan hjelpekorpset til Bergen Røde Kors stiller med ti–tolv frivillige, har kvart av dei andre hjelpekorpsa heile tida kring fem frivillige på vakt, forklarar Jensen.
– Samla sett er me godt bemanna og budde, seier ho.
I fjor fortalde Jensen at NRKH streva med rekrutteringa. Sjølv om det lokale hjelpekorpset i år har ei ordning der fem er på vakt heile tida, betyr ikkje det at rekrutteringsproblemet er borte, forklarar leiaren.
– Det er tungt å få folk til å vera med og å få nye inn, seier Jensen.
Ho trur at nokre av årsakene kan vera at folk er travle, og at dei ynskjer å driva med andre aktivitetar. Ho har også eit inntrykk av at fleire held seg meir heime enn før pandemien, fortel ho.
I tillegg til at NRKH har eit knippe frivillige på lagshytta ved Ungdomsheimen-tomta, har fleire av medlemane i laget kort reiseveg dersom det skulle oppstå noko. Det er med andre ord ikkje vanskeleg å få tak i folk, understrekar Jensen.
– Ta forholdsreglar
Dersom vêret er stabilt dei komande dagane, kan det ifylgje NRKH-leiaren vera fare for skred enkelte stader i fjellet. Det er viktig å sjekka både vêr- og skredmeldingar før ein legg ut på tur, presiserer ho.
– Kva anna bør folk hugsa på?
– Bruk solkrem! I alle fall om vêret er bra. Dessutan er det alltid viktig å ha med seg ekstra klede, slik at ein er førebudd på at turen kan ta lengre tid enn ein trudde. Og ta med skredutstyr! oppmodar Jensen.
Frivillige i Øystese Røde Kors Hjelpekorps plar ha vakt på lagshytta Dyrbu i Hamlagrø. Korleis vaktordninga vert i området i år, er uvisst. HF lukkast ikkje med å få tak leiarane i laget måndag.
