Stille og skadefri påske
Hjelpekorpsa i Kvam opplyser at dei ikkje har registrert ein einaste skade i påsken.
— Det har ikkje vore mykje aktivitet, men ein god del varekøyring, seier leiar Ingeborg Steine Jensen i Norheimsund Røde Kors Hjelpekorps, som er stasjonert i hytta ved Ungdomsheimen-tomta.
«Høgdepunktet» var då laget kunne dela ut ein ispose laurdag, men den skadde sat trygt plassert i ei hytte.
— Det har vore stille, seier Rune Lie Øyri på vegner av Øystese Røde Kors Hjelpekorps, som har base i Hamlagrø.
Båe korpsa har hatt redusert mannskap på vakt av omsyn til smittevern, men har kunna tilkalla forsterkingar om det var trong for det.
Også leiar av hjelpekorpset til Arna og Åsane Røde Kors, Thomas Hopland, melder om ein roleg påske. Bortsett frå litt småtteri i skitrekket har høgtida vore skade- og aksjonsfri.
Den same meldinga kjem frå leiar Birger Åsheim i Bergen Røde Kors Hjelpekorps, som held til i Føykely i Mødal.
— Til trass for mykje folk har det vore roleg. Folk har vore flinke på ski, seier Åsheim.
Han fortel at hjelpekorpset rykte ut med skuter og hjelpte nokon med å koma seg ned frå området Såta—Kvitingen i helga.
Det tradisjonelle påskerennet som korpset hans plar skipa til, måtte droppast i år på grunn av smittevern. Erstatninga, eit rebusløp til Mødal, har vore svært populært, fortel Åsheim.
Dei tre store utfartsdagane var skjærtorsdag, langfredag og påskeaftan, då vêret var godt. Sundag vart det eit kraftig vêrbyte og snøvêr også i låglandet på kvelden.
