Stien til Krokavatn vert lagd om

Det går fram av detaljplanen for miljø og landskap, forfatta av Norconsult AS på vegner av Kvam Kraftverk AS. Planen er send til godkjenning hjå Noregs vassdrags- og energidirektorat.

Hovuddelen av anleggsarbeida er planlagd i sommarhalvåret 2023. Ein startar i april og tek sikte på å fullføra arbeidet i oktober. Det kan, avhengig av lengda på sesongen, verta naudsynt å sluttarrondera og rigga ned den etterfylgjande sesongen.

Det vert skilta alternative stiar til Krokavatnet. Turgåarar må parkera lenger nede i vegen. Parkeringsplassen på Solhaug er utvida og oppgradert i samband med bygginga av dagsturhytta. Arealet vil verta nytta til snuplass for betongbilar og omlasting til helikopter. Det vil vera behov for tiltak enkelte stader på stien for å få ein breiare mellombels tilkomeveg.

Dette skal gjerast

Dammane stettar ikkje nye krav til mellom anna stabilitet. Anlegget består av to murdammar; hovuddammen i nordaust og sekundærdammen i nordvest, og ein kort, tørrmura sperredam.

Hovuddammen er bygd som ein tørrmur med oppstraums betongtetting. Heile dammen er fundamentert på berg. Dammen er om lag 55 meter lang og om lag 8 meter høg. Denne skal hevast med ei 1 meter høg brystning. Han skal få påstøypt ei 300 millimeter tjukk betongplate på oppstraums side.

Sekundærdammen er ein tørrmur frå 1937 med oppstraums tetting av jord og torv, verna med eit skråningsvern av ei 0,3 meter tjukk plastring med helleforma stein. Han er om lag 120 meter lang og 3 meter høg. Den vestre delen av dammen består av 30 meter utelukkande stampa sandjord og torv og plastring i ytre sjikt. Denne delen av dammen vert rekna for ein jorddam.

Fyllinga og skråningsvernet skal gravast av. Murkroppen skal støypast på med ei 300 millimeter tjukk plate og vil få bergboltar. Den delen av sekundærdammen som berre består av fylling, vil verta fjerna og erstatta av ein massivdam i betong. Denne delen vil verta forblenda med stein.

Sekundærdammen vil som fylgje av plata endra utsjånad i større grad enn hovuddammen. Vegetasjonsdekket på toppen av sekundærdammen skal gravast av. Massane skal deponerast i magasinkanten søraust for dammen.

Alt avfall skal leverast til godkjent mottak. Unntaket er lausmassar frå sekundærdammen, som det er planlagt å deponera i magasinkanten ved dammen.

Med helikopter

Ein eksisterande traktorveg frå Kaldestad, på vestsida av Sandvenelvi, skal nyttast for å få tilkomst til sekundærdammen. For å koma til hovuddammen, vil det vera behov for å utbetra delar av stien frå Solhaug noko.

Stien til dagsturhytta Kvilekroken er i dag skilta og går over sekundærdammen. Kraftverket ynskjer ikkje gangtrafikk på dammen, så det vil verta etablert ein sti på nedsida av han.

Overskotet av vekstmassar frå avgravinga av dammen skal nyttast til topplag på deponiet og elles til å setja i stand råka areal rundt dammen.

Det vil ikkje vera behov for å etablera nye permanente vegar. Ingen av vegane er gode nok til å frakta betong med bil til dammane, så helikopter skal nyttast. Transportkorridoren vil verta varsla med skilt. Også brakker og tungt utstyr skal flygast opp.

Økologisk restaurering

Maksimalt 1.800 kubikkmeter massar må leggjast i deponi ved sekundærdammen. Dei består av om lag 1.400 kubikkmeter torv, sand og morene som har fungert som tetting i dammen. Utanom dette har 300 kubikkmeter større stein fungert som skråningsvern.

Målet for å setja i stand dei råka areala er å få ei samansetjing av vegetasjonen som vert mest mogleg lik den i områda omkring. Det vil skje ved hjelp av naturleg revegetering. Topplaget av eksisterande jordmassar frå området vil verta lagde tilbake på toppen av arrondert terreng. Topplaget er det øvste jordlaget med vegetasjon, røter og frøbank, om lag dei ti øvste centimeterane med jord.

Alle arbeida skal utførast tørre, så ein vil sleppa vatnet forbi i anleggsperioden. Anleggsmaskiner må reingjerast før dei vert transporterte inn i området, slik at framande artar ikkje vert spreidde.

Området er registrert som viktig for friluftslivet. Turen til den kommunale dagsturhytta Kvilekroken er mest populær. Området vert elles nytta til beite. Utbyggjaren reknar ikkje med at anleggsarbeida vil vera til hinder, men vil halda løpande kontakt med grunneigar og beitelag.

– Viktig med god informasjon

Detaljplanen er send på høyring til offentlege styresmakter. Kvam herad påpeikar i eit høyringssvar at det vil vera viktig med god informasjon om alternative tilkomevegar i anleggsfasen, slik at det ikkje oppstår uheldige konfliktar mellom friluftsliv og anleggsarbeid. Kvam herad ynskjer tett dialog mellom heradet og utbyggjar. Tilkome på nedsida av dammane kan vera ei god løysing for dyr som skal vidare til fjells, skriv rådmannen.

Nye naturinngrep ved dammane må avgrensast mest mogeleg, og områda må stellast til att etter moderne prinsipp, skriv Statsforvaltaren i ei fråsegn. Han meiner at rehabilitering av dammane er naudsynt og har stor samfunnsnytte. Han legg til grunn at stein- og jordmassar vert handterte i tråd med reglane.

Også Statsforvaltaren tilrår god dialog med friluftsinteresser.