Stengjer vegen i kveld
Vegen mellom Jondal og Odda vert stengd onsdag kveld klokka 22 for å hindra ulukker.
Det opplyser ordførar Roald Aga Haug på vegner av den kommunale kriseleiinga (KKL) i Ullensvang etter eit møte onsdag ettermiddag. Vegen vert i fyrste omgang stengd til klokka 10 torsdag. Då vert stoda vurdert igjen.
I tillegg set Statens vegvesen ut lyttevakt ved Teigen, Byrkjenes og Stana med tanke på skredfaren.
Artikkelen held fram under annonsen.
Ifylgje KKL har kommunalt tilsette gjort det dei kan for å førebu seg på kraftig regn og raude farevarsel. Særleg uroa er KKL over sideelvar og bekker.
– Situasjonen kan verta heftig, og me ser nøye på korleis vi kan førebyggja mest mogeleg, heiter det i åtgaumskrivet.
M/S «Pilajente» er hyra inn som beredskapsbåt med plass til 12 passasjerar. Helsetenestene fylgjer utviklinga og tilpassar seg ut frå henne. I oppvekstsektoren vert det vurdert om nokre skular eller barnehagar må stengja torsdag.
KKL oppmodar folk om å droppa uturvande ferdsle på vegane.
Krisleiinga skal samlast igjen torsdag klokka 11.
Planlagde møte i formannskapet og kommunestyret torsdag vert digitale, opplyser kommunesekretær Ragnvald Joakimsen onsdag ettermiddag.
