Stengjer Tokagjelet for øving
Ei beredskapsøving stengjer Tokagjelet i fleire timar tysdag kveld. Den offisielle versjonen er ein litt annan.
Ifylgje vegmeldingstenesta til Statens vegvesen vert vegen stengd frå klokka 19 til 23 – på grunn av vegarbeid i Hansagjeltunnelen. Den same meldinga har Kvam herad adoptert.
Brannvernleiar for tunnel i avdelinga for infrastruktur og veg i Vestland fylkeskommune, Marie S. Hatlen, opplyser at øvinga truleg vil vera ferdig til klokka 21. Det er likevel sett ei vid tidsramme, ettersom tidspunktet er usikkert.
Ho kan ikkje seia meir om kva øvinga går ut på før ho er over. Årsaka er at dei involverte ikkje skal vita kva dei går til, slik at øvinga vert mest mogeleg realistisk. Om det dårlege vêret denne veka får fylgjer for øvinga, må vurderast nærare.
Hatlen seier at ho reknar med at det er opplyst om at det skal vera vegarbeid fordi ein til dømes skal testa dei nye bommane i endane av Tokagjelet. Det skal såleis ikkje utførast vegarbeid i den nemnde tunnelen, slik Kvam herad altså opplyste.
