Stengjer Na Nam Nam
Thaimatvogna Na Nam Nam har stått ved kommunehuset i Jondal kvar sommar dei siste ni åra. I år er den vekke.
Dette skriv Hardanger Folkeblad. Ifølgje avisa vert vogna driven av Johannes Haugland Eide og kona Sunee. Eide fortel at i ni år på rad har vogna fått stå gratis ved «Blåhuset». Straumen har òg vore gratis.
Det er det no slutt på. Kommunen krev at dei både betalar straumen og 350 kroner døgnet i leige av plassen. Ifølgje Eide vil prisen koma på godt over 10.000 kroner i månaden. Det har dei ikkje råd til. Dermed er vogna inntil vidare parkert i hagen, fortel Eide til oddabladet.
Som om ikkje krava frå kommunen var ille nok, har også mykje av kundegrunnlaget forsvunne etter at det byrja gå to ferjer på sambandet mellom Jondal og Tørvikbygd. Etter at ferja byrja gå kvar halvtime, har den reduserte ventetida gjort at om lag 80 prosent av kundane har forsvunne.
Hardanger Folkeblad har snakka med Ullensvang kommune. Rådmann Ole-Jørgen Jondahl seier til avisa at han forstår at ordninga med gratis plass og straum ved det gamle kommunehuset har vore gunstig for Na Nam Nam. Han viser til gebyrregulativet som vart vedteke i 2022, og seier at det ikkje er mogleg for kommunen å krevja gebyr frå andre verksemder dersom Na Nam Nam skal få sleppa.
